IMIZEKELISO 9

₁Ubulumko buyakhile indlu yabo,

Buzixholile iintsika zabo zosixhenxe;

₂Buzixhelile iinkomo zabo, buyiphithikezile iwayini yabo;

Busilungisile nesithebe sabo;

₃Buthume umthinjana wabo, buyamema

Ezingqolweni zeenduli zesixeko, buthi,

₄Ngubani na osisiyatha? Makaphambukele apha.

Oswele intliziyo, buthi kuye,

₅Yizani nidle isonka sam,

Nisele iwayini endiyiphithikezileyo.

₆Yekani ukuba ziziyatha, niphile,

Ninyathele endleleni yengqondo.

₇Othethisa umgxeki uzizekela ucukucezo;

Owohlwaya ongendawo uzizekela isiphako.

₈Musa ukumohlwaya umgxeki, hleze akuthiye;

Yohlwaya isilumko, sókuthanda.

₉Siluleke isilumko, sólumka okunye;

Lazise ilungisa, lókongeza ukufunda.

₁₀Yingqalo yokulumka ukoyika uYehova;

Ukumazi oyiNgcwele kwaphela yingqondo.

₁₁Kuba yoba mininzi imihla yakho,

Wongezwe iminyaka yobomi.

₁₂Ukuba ùthe walumka, uzilumkela okwakho;

Ukuba ùthe wagxeka, oko wokuthwala wedwa.

₁₃Umfazi onguNonyabi uyaxokozela,

Unobuyatha, akazi nto;

₁₄Uhleli emnyango endlwini yakhe esihlalweni,

Ezindaweni eziphezulu zesixeko,

₁₅Ukuba ameme abadlula ngendlela,

Abalungelelanisa umendo wabo, esithi,

₁₆Ngubani na osisiyatha? Makaphambukele apha.

Koswele intliziyo, uthi yena,

₁₇Amanzi abiweyo anencasa,

Nesonka esityiwa ngasese simnandi kunene.

₁₈Àkazi ukuba abafileyo bakhona;

Basezinzulwini zelabafileyo abamenywa bakhe.