IINDUMISO 1

₁Hayi, uyolo lomntu ongahambiyo ngecebo labangendawo,

Ongemiyo endleleni yaboni,

Ongahlaliyo embuthweni yabagxeki!

₂Yena unonelela umyalelo kaYehova;

Ucamanga ngomyalelo wakhe imini nobusuku:

₃Unjengomthi omiliselwe phezu kwemijelo yamanzi,

Onika isiqhamo sawo ngexesha lawo,

Ogqabi lawo lingabuniyo;

Konke akwenzayo kophumelela.

₄Àbanjalo abangendawo;

Bòna banjengomququ ophetshethwa ngumoya.

₅Ngenxa yoko abangendawo abanakuma emgwebeni,

Naboni ebandleni lamalungisa.

₆Ngokuba uYehova uyayazi indlela yamalungisa;

Ke yona indlela yabangendawo iya kudaka.