IINDUMISO 107

₁Bulelani kuYehova, ngokuba elungile,

Ngokuba ingunaphakade inceba yakhe.

₂Mabatsho abakhululwa bakaYehova,

Awabakhululayo esandleni sombandezeli;

₃Wababutha emazweni,

Empumalanga nasentshonalanga,

Entla naselwandle.

₄Badinga entlango, endleleni esenkanga,

la, Àbafumana mzi wakuhlala.

₅Belambile, benxaniwe,

Watyhafa phakathi kwabo umphefumlo wabo.

₆Bakhala ke kuYehova embandezelweni yabo,

Wabahlangula ekucuthekeni kwabo;

₇Wabanyathelisa endleleni ethe tye,

Ukuba baye kumzi wokuhlala.

₈Mabayibulele kuYehova inceba yakhe,

Nemisebenzi yakhe ebalulekileyo koonyana babantu!

₉Kuba ewuhluthisile umphefumlo otshobayo,

Wawuzalisa ngokulungileyo umphefumlo olambileyo.

₁₀Behleli emnyameni nasethunzini lokufa,

Bekhonkxwe yimbandezelo nasisinyithi,

₁₁Ngokuba bephikise amazwi kaThixo,

Belitshitshisa icebo lOsenyangweni:

₁₂Wayithoba intliziyo yabo ngokubasebenzisa kanzima;

Bakhubeka, akwabakho mncedi.

₁₃Bakhala ke kuYehova embandezelweni yabo;

Wabasindisa ekucuthekeni kwabo.

₁₄Wabakhupha emnyameni nasethunzini lokufa,

Waziqhawula iimbophelebo zabo.

₁₅Mabayibulele kuYehova inceba yakhe,

Nemisebenzi yakhe ebalulekileyo koonyana babantu!

₁₆Kuba ezaphule iingcango zobhedu,

Wayixakaxa imivalo yesinyithi.

₁₇Abamathileyo, ngenxa yendlela yokukreqa kwabo,

Nangenxa yobugwenxa babo, bácinezelwa;

₁₈Konke ukudla kwaba lisikizi kumphefumlo wabo,

Báfika emasangweni okufa.

₁₉Bákhala ke kuYehova embandezelweni yabo,

Wabasindisa ekucuthekeni kwabo.

₂₀Wathumela ilizwi lakhe, wabaphilisa,

Wabasiza ezihogweni zabo.

₂₁Mabayibulele kuYehova inceba yakhe,

Nemisebenzi yakhe ebalulekileyo koonyana babantu!

₂₂Mababingelele imibingelelo yombulelo,

Bancokole ngezenzo zakhe bememelela.

₂₃Abaya elwandle ngeenqanawa,

Benze ishishini emanzini amaninzi,

₂₄Bazibona bona izenzo zikaYehova,

Nemisebenzi yakhe ebalulekileyo enzulwini.

₂₅Watsho, wavusa umoya ovuthuzayo,

Waphakamisa amaza ayo.

₂₆Banyuka basinga ezulwini, behla basinga emanzini enzonzobila;

Umphefumlo wabo uthe amandla bububi.

₂₇Bathendeleka, bahexa njengenxila,

Butshone bonke ubulumko babo.

₂₈Bakhala ke kuYehova embandezelweni yabo,

Wabakhupha ekucuthekeni kwabo.

₂₉Ukumisile ukuvuthuza, kwathi cwaka,

Amaza ayo azola;

₃₀Bavuya ke, kuba edambile;

Wabafikisa echwebeni abalilangazelelayo.

₃₁Mabayibulele kuYehova inceba yakhe,

Nemisebenzi yakhe ebalulekileyo koonyana babantu!

₃₂Mabamphakamise ebandleni labantu,

Bamdumise embuthweni yamadoda amakhulu.

₃₃Úyenze imilambo yaba yintlango,

Namathende amanzi aba ngumhlaba onxaniweyo;

₃₄Ilizwe elineziqhamo laba leletyuwa,

Ngenxa yezinto ezimbi zabemi balo.

₃₅Úyenze intlango yaba lidike elinamanzi,

Ilizwe elingumqwebedu laba ngamathende amanzi.

₃₆Wabahlalisa khona abalambileyo,

Bamisa umzi wokuhlala.

₃₇Bahlwayela amasimi, batyala izidiliya,

Bavelisa iziqhamo, baba nongeniselo.

₃₈Wabasikelela, banda kunene,

Iinkomo zabo akazinciphisa.

₃₉Bancipha, basibekeka

Ngokukhanyangwa bububi nesingqala.

₄₀Úwagalele ngendelo amanene,

Wawadingisa enyanyeni, kungekho ndlela.

₄₁Walisa engxondeni ihlwempu, kùde nengcinezelo,

Walenzela imizalwana yanjengomhlambi.

₄₂Baya kubona abathe tye, bavuye,

Bonke ubugqwetha buvale umlomo.

₄₃Lowo ulumkileyo makazigcine ezi ndawo,

Azigqale iinceba zikaYehova.