IINDUMISO 109

₁Thixo wendumiso yam, musa ukuthi tu;

₂Ngokuba bandakhamisele umlomo ongendawo, nomlomo onenkohliso;

Bathetha ngam ngolwimi lobuxoki.

₃Bandijikele ngeentetho zentiyo;

Balwa nam ngelizé.

₄Ekubeni mna ndibathanda, bona bayandichasa,

Ndibe mna ndithandaza.

₅Endaweni yobulungisa bandibuyekeza ngobubi;

Ekubeni mna ndibathanda, bona bayandithiya.

₆Misa ongendawo, abe ngumveleli wakhe,

Eme uSathana ngasekunene kwakhe.

₇Ekuthethweni kwetyala makaphume engongendawo,

Nomthandazo wakhe ube sisono.

₈Imihla yakhe mayibe mbalwa,

Mabuthatyathwe ngomnye ubuveleli bakhe.

₉Oonyana bakhe mababe ziinkedama,

Nomkakhe abe ngumhlolokazi;

₁₀Babhadule bebhadula oonyana bakhe, becela,

Bengqiba, bekude namanxuwa akowabo.

₁₁Umboleki-mali makakushwankathele konke anako,

Abasemzini baphange ukuxelenga kwakhe.

₁₂Makungabikho wolulela nceba kuye,

Kungabikho uzibabalayo iinkedama zakhe.

₁₃Izivela-mva zakhe mazibe zezokunqunyulwa,

Igama lazo licinywe esizukulwaneni esizayo.

₁₄Mabukhunjulwe nguYehova ubugwenxa booyise,

Singàcinywa isono sonina.

₁₅Masibe phambi koYehova ngamaxesha onke,

Akunqumle ehlabathini ukukhunjulwa kwabo;

₁₆Ngenxa enokuba engakukhumbulanga ukwenza inceba,

Etshutshise indoda elusizana,

Elihlwempu, enentliziyo eyothukileyo, ukuba ayibulale.

₁₇Ewe, wathanda ukuqalekisa, kwamfikela;

Akakufuna ukusikelela, kwakhwelela kùde kuye.

₁₈Wambatha ukuqalekisa kwanga yingubo yakhe,

Kwangena embilinini wakhe njengamanzi,

Nanjengeoli emathanjeni akhe.

₁₉Makube njengengubo kuye, azithe wambu ngayo,

Kube luqhwemesha, alunxibe amaxesha onke.

₂₀Nguwo lowo umvuzo wabandichasayo, ophuma kuYehova,

Wabathetha okubi ngomphefumlo wam.

₂₁Ke wena Yehova, Nkosi, ndénzele ngenxa yegama lakho;

Ngokokuba ilungile inceba yakho; ndíhlangule.

₂₂Ngokuba ndilusizana, ndilihlwempu,

Intliziyo yam ihlatyiwe phakathi kwam.

₂₃Ndijengethunzi xa lolukayo, ndiyemka;

Ndiphetshethwa njengenkumbi.

₂₄Amadolo am ayagexa kukuzila ukudla,

Nenyama yam ibhityile, tu ukutyeba.

₂₅Ndithe ndasisingcikivo kubo;

Béndibona, bahlunguzela intloko.

₂₆Ndíncede, Yehova, Thixo wam,

Ndísindise ngokwenceba yakho;

₂₇Bazi ukuba sisandla sakho eso,

Ukuba kukwenza kwakho, Yehova.

₂₈Bayaqalekisa aba, ùyasikelela wena;

Besukile bema, baya kudana; ùya kubuya yena umkhonzi wakho.

₂₉Abandichasayo baya kwambatha ihlazo,

Bazithi wambu ukudana njengengubo yokwaleka.

₃₀Ndiya kubulela kakhulu kuYehova ngomlomo wam,

Ndimdumise phakathi kwabaninzi;

₃₁Kuba emi ekunene kolihlwempu,

Ukuba amsindise kwabawugwebayo umphefumlo wakhe.