IINDUMISO 119

₁Hayi, uyolo lwabandlela igqibeleleyo,

Bona bahambayo ngomyalelo kaYehova!

₂Hayi, uyolo lwababambe izingqiniso zakhe,

Abamquqelayo ngentliziyo epheleleyo!

₃Àbasebenzi nokusebenza bugqwetha,

Bayahamba ngeendlela zakhe.

₄Ùzimisile iziyalezo zakho,

Ukuba zigcinwe kunene.

₅Azaba iindlela zam bezibhekiselwe

Ukugcina imimiselo yakho!

₆Bendingayi kudana ke

Ekubhekeni kwam kwimithetho yakho yonke.

₇Ndiya kubulela kuwe ngentliziyo ethe tye,

Ekuzifundeni kwam izigwebo zobulungisa bakho.

₈Ndiya kuyigcina imimiselo yakho,

Musa ukundishiya kuphele.

₉Umfana uya kuwuqaqambisa ngantoni na umendo wakhe?

Ngokuzigcina ngokwelizwi lakho.

₁₀Ndiya kuquqela kuwe ngentliziyo yam yonke;

Musa ukundilahlekanisa nemithetho yakho.

₁₁Ndiyibeké intetho yakho entliziyweni yam,

Ukuze ndingoni kuwe.

₁₂Ungowokubongwa, Yehova;

Ndífundise imimiselo yakho.

₁₃Ndiyawabalisa ngemilebe yomlomo wam

Onke amasiko omlomo wakho.

₁₄Ndinemihlali endleleni yezingqiniso zakho,

Ngathi kusebuncwaneni bonke.

₁₅Ndiya kucamngca ngeziyalezo zakho,

Ndibheke kumendo wakho.

₁₆Ndiyaziyolisa ngemimiselo yakho;

Andiyi kulilibala ilizwi lakho.

₁₇Mphathe kakuhle umkhonzi wakho, ndidle ubomi,

Ndigcíne ilizwi lakho.

₁₈Vula amehlo am, ukuba ndiyibone

Imisebenzi ebalulekileyo yasemyalelweni wakho.

₁₉Ndingumphambukeli ehlabathini,

Musa ukuyisithelisa kum imithetho yakho.

₂₀Umphefumlo wam ucumkile ngokulangazelela

Amasiko akho ngamaxesha onke.

₂₁Ùbakhalimele abakhukhumali,

Ábaqalekiswa abo, balahlekeneyo nemithetho yakho.

₂₂Shenxisa imke kum ingcikivo nendelo,

Ngokuba ndizibambile izingqiniso zakho.

₂₃Nangona abathetheli behlala bathethe ngam,

Umkhonzi wakho yena ucamngca ngemimiselo yakho.

₂₄Izingqiniso zakho ziziyoliso zam noko,

Zingamaphakathi am.

₂₅Umphefumlo wam unamathéle eluthulini;

Ndíphilise ngokwelizwi lakho.

₂₆Ndizicacisile iindlela zam, wandiphendula;

Ndífundise imimisela yakho.

₂₇Ndíqondise iindlela zeziyalezo zakho,

Ndicamngce ngemisebenzi yakho ebalulekileyo.

₂₈Umphefumlo wam uvuza iinyembezi sisingqala,

Ndímise ngokwelizwi lakho.

₂₉Indlela yobuxoki yisuse kum;

Ndíbabale umyalelo wakho.

₃₀Ndiyinyúle indlela yokuthembeka;

Amasiko akho ndijolisé kuwo.

₃₁Ndinamathéle ezingqinisweni zakho;

Musa ukundidanisa, Yehova.

₃₂Ndigidima ngendlela yemithetho yakho,

Ngokuba uyenzé banzi intliziyo yam.

₃₃Ndíyalele, Yehova, indlela yemimiselo yakho,

Ndiyibàmbe kuphele.

₃₄Ndíqondise, ndibámbe umyalelo wakho,

Ndiwugcìne ngentliziyo yonke.

₃₅Ndínyathelise endleleni yemithetho yakho,

Ngokuba ndiyithandile.

₃₆Intliziyo yam yithobele ezingqinisweni zakho,

Ungayithobeli ekubaweni.

₃₇Dlulisa amehlo am angakhangeli inkohlakalo,

Ndíphilise ngeendlela zakho.

₃₈Zalisa kumkhonzi wakho intetho yakho,

Eyokuba bakoyike.

₃₉Yidlulise ingcikivo yam endinxunguphala yiyo,

Ngokuba amasiko akho alungile.

₄₀Nanku ndilangazelela iziyalezo zakho,

Ndíphilise ngobulungisa bakho.

₄₁Mazize kum iinceba zakho, Yehova,

Nosindiso lwakho ngokwentetho yakho;

₄₂Ndimphèndule ngelizwi ondingcikivayo,

Ngokuba ndikholose ngelizwi lakho.

₄₃Musa ukuda ulihluthe emlonyeni wam ilizwi lenyaniso,

Ngokuba ndilindele izigwebo zakho;

₄₄Ndowugcina umyalelo wakho ngamaxesha onke,

Ngonaphakade kanaphakade;

₄₅Ndihamba-hàmbe endaweni ebanzi,

Ngokuba ndifuna iziyalezo zakho.

₄₆Ndothetha ngezingqiniso zakho phambi kokumkani,

Ndingabi nakudana.

₄₇Ndoziyolisa ngemithetho yakho

Endiyithandayo;

₄₈Ndiziphakámise izandla zam emithethweni yakho endiyithandayo,

Ndicamngce ngemimiselo yakho.

₄₉Khumbula ilizwi lakho kumkhonzi wakho,

Ngenxa enokuba ùndithembise lona.

₅₀Yiyo le intuthuzelo yam ekucinezelekeni kwam,

Yokuba intetho yakho indiphilisile.

₅₁Abakhukhumali bada bandigxeka kakhulu;

Kanti àndithi gu bucala emyalelweni wakho.

₅₂Ndawakhumbula amasiko akho kususela kwanaphakade, Yehova,

Ndathuthuzeleka.

₅₃Ndingenwé ngumsindo oshushu,

Ndisenziwa ngabangendawo abalahla umyalelo wakho.

₅₄Iziingoma kum imimiselo yakho,

Endlwini yokuphambukela kwam.

₅₅Ndilikhumbúle ebusuku igama lakho, Yehova,

Ndawugcina umyalelo wakho.

₅₆Ndinikwe oku,

Ukuba ndibambe iziyalezo zakho.

₅₇Isabelo sam, Yehova, ndithi,

Sesokuba ndigcine amazwi akho.

₅₈Ndiya kubongoza ngentliziyo yonke,

Ndíbabale ngokwentetho yakho.

₅₉Ndazicingela iindlela zam,

Ndazibuyisela iinyawo zam ezingqinisweni zakho.

₆₀Ndikhawulezile andazila-zila

Ukugcina imithetho yakho.

₆₁Izintya zabangendawo zindithandele,

Àndiwulibele umyalelo wakhe noko.

₆₂Ndivuka phakathi kobusuku, ndibulele kuwe,

Ngenxa yezigwebo zobulungisa bakho.

₆₃Ndilidlelane labo bonke abakoyikayo,

Nelabazigcinayo iziyalezo zakho.

₆₄Inceba yakho, Yehova, izalise ihlabathi;

Ndífundise imimiselo yakho.

₆₅Umenzéle okulungileyo umkhonzi wakho,

Yehova, ngokwelizwi lakho.

₆₆Ndífundise, ndibe nemvo nokwazi okulungileyo,

Ngokuba ndikholwa yimithetho yakho.

₆₇Ndingekacinezelwa, ndaye ndilahleka;

Kungoku ndiyigcinile intetho yakho.

₆₈Ùlungile wena, ulungisa;

Ndífundise imimiselo yakho.

₆₉Abakhukhumali bathungele ubuxoki ngam;

Mna ndizibamba ngentliziyo yonke iziyalezo zakho.

₇₀Ithe fithi kukutyeba intliziyo yabo;

Ke mna ndiziyolisa ngomyalelo wakho.

₇₁Kundilungele okokuba ndacinezelwayo,

Ukuze ndiyifunde imimiselo yakho.

₇₂Ùlungile kum umyalelo womlomo wakho,

Ngaphezu kwamawaka egolide nesilivere.

₇₃Izandla zakho zindenzile, zandilungisa;

Ndíqondise, ndifùnde imithetho yakho.

₇₄Abakoyikayo bondibona, bavuye,

Ngokuba ndilindele elizwini lakho.

₇₅Ndiyazi, Yehova, ukuba zinobulungisa izigwebo zakho;

Ùndicinezèle, phofu ùthembekile.

₇₆Ngamana inceba yakho yaba yeyokundithuthuzela,

Njengokwentetho yakho kumkhonzi wakho.

₇₇Mazize kum iimfesane zakho, ndiphile,

Ngokuba umyalelo wakho undiyolisa.

₇₈Mabadane abakhukhumali, ngokuba béndigobele phantsi ngobuxoki,

Mna ndicamngca ngeziyalezo zakho.

₇₉Mabandibuyele abakoyikayo,

Nabazaziyo izingqiniso zakho.

₈₀Mayigqibelele intliziyo yam emimiselweni yakho,

Ukuze ndingadani.

₈₁Umphefumlo wam uyaphela kukululangazelela usindiso lwakho,

Ndilindéle elizwini lakho.

₈₂Amehlo am ayaphela kukulangazelela intetho yakho,

Ndisithi, Ùya kundithuthuzela nini na?

₈₃Noko ndithe ndaba njengentsuba emsini;

Andiyilibali imimiselo yakho.

₈₄Zingaphi na iintsuku zomkhonzi wakho?

Ùya kuda ubagwebe nini na abandisukelayo?

₈₅Abakhukhumali bandimbele izihogo,

Abangenamyalelo wakho.

₈₆Yonke imithetho yakho ithembekile:

Bandisukela ngobuxoki; ndíncede.

₈₇Baphantse ukundigqibela emhlabeni,

Ke mna andizilahli iziyalezo zakho.

₈₈Ndíphilise ngokwenceba yakho,

Ndizigcine izingqiniso zomlomo wakho.

₈₉Lingunaphakade, Yehova,

Limi emazulwini ilizwi lakho.

₉₀Ukuthembeka kwakho kukwizizukulwana ngezizukulwana;

Ulizinzisile ihlabathi, lema.

₉₁Ezo zinto zimele izigwebo zakho nanamhla,

Ngokuba iinto zonke zingabakhonzi bakho.

₉₂Koko umyalelo wakho wandiyolisáyo,

Ndinge ndaphelayo ekucinezelekeni kwam.

₉₃Andiyi kuzilibala naphakade iziyalezo zakho,

Ngokuba undiphilisile ngazo.

₉₄Ndingowakho mna, ndísindise,

Kuba ndicamanga ngeziyalezo zakho.

₉₅Abangendawo bandilindile ukuze banditshabalalise;

Mna ndigqalé izingqiniso zakho.

₉₆Yonke inzaliseko ndiyibonile apho iphela khona;

Ke wona umthetho wakho ngumphangalala omkhulu.

₉₇Hayi, ukuwuthanda kwam umyalelo wakho!

Imini le yonke ndiyacamngca ngawo.

₉₈Indifundisa ubulumko ngaphezu kweentshaba zam imithetho yakho,

Ngokuba yeyam ngonaphakade.

₉₉Ndìnokuqiqa ngaphezu kwabafundisi bam bonke,

Ngokuba ngezingqiniso zakho ndiyacamngca.

₁₀₀Ndinokuqonda ngaphezu kwamadoda amakhulu,

Ngokuba ndizibamba iziyalezo zakho.

₁₀₁Ndizinqandile iinyawo zam kwiindlela zonke ezimbi,

Ukuze ndiligcine ilizwi lakho.

₁₀₂Andisuki emasikweni akho,

Ngokuba ùndiyalile wena.

₁₀₃Hayi, ukuba mnandi kwentetho yakho ekhuhlangubeni lam!

Igqithe nobusi emlonyeni wam.

₁₀₄Ngeziyalezo zakho ndinokuqonda,

Ngenxa yoko ndiwuthiyile wonke umendo wobuxoki.

₁₀₅Lisisibane seenyawo zam ilizwi lakho,

Likukukhanya emendweni wam.

₁₀₆Ndikufungele, ndikumisile,

Ukuzigcina izigwebo zobulungisa bakho.

₁₀₇Ndide ndacinezeleka kakhulu;

Yehova, ndíphilise ngokwelizwi lakho.

₁₀₈Ngamana wakholeka kuwe, Yehova, umbingelelo wesisa womlomo wam;

Ndífundise amasiko akho.

₁₀₉Umphefumlo wam uhlala usesandleni sam,

Ndingàwulibali umyalelo wakho.

₁₁₀Abangendawo bandenzele umgibe,

Andiphambukanga eziyalezweni zakho.

₁₁₁Ndizidlé ilifa izingqiniso zakho ngonaphakade,

Ngokuba ziyimihlali yentliziyo yam;

₁₁₂Intliziyo yam ndiyithobele ekwenzeni imimiselo yakho

Ngonaphakade, kuphele.

₁₁₃Abambaxa ndiyabathiya,

Wona umyalelo wakho ndiyawuthanda.

₁₁₄Isithe lam nengweletshetshe yam nguwe,

Ndìlindele elizwini lakho.

₁₁₅Sukani kum, nina benzi beento ezimbi,

Ndibámbe imithetho yoThixo wam.

₁₁₆Ndízimase ngokwelizwi lakho, ndiphile,

Ungandidanisi ekulindeni kwam.

₁₁₇Ndíxhase ndisinde,

Ndihlale ndibheke emimiselweni yakho.

₁₁₈Ubacukucezile bonke abalahlekana nemimiselo yakho,

Ngokuba inkohliso yabo ibubuxoki.

₁₁₉Wena ususa bonke abangendawo behlabathi njengentlenga,

Ngoko ndiyazithanda izingqiniso zakho.

₁₂₀Inyama yam isuka ihambe kukunkwantyiswa nguwe,

Ndizoyike izigwebo zakho.

₁₂₁Ndenza ngesiko nangobulungisa,

Ungandinikeli kwabandicudisayo.

₁₂₂Mmele umkhonzi wakho, kulunge;

Mabangandicudisi abakhukhumali.

₁₂₃Amehlo am ayaphela kukululangazelela usindiso lwakho,

Nentetho yobulungisa bakho.

₁₂₄Umkhonzi wakho menzele ngokwenceba yakho

Undifundise imimiselo yakho.

₁₂₅Ndingumkhonzi wakho, ndiqondise,

Ndizàzi izingqiniso zakho.

₁₂₆Lilixa lokuba uYehova enze,

Kuba bawaphúle umyalelo wakho.

₁₂₇Ngenxa yoko ndiyithanda imithetho yakho

Ngaphezu kwegolide, nakwengcwengiweyo.

₁₂₈Ngenxa yoko ndithi, Zonke iziyalezo zakho zithe tye ngezinto zonke;

Wonke umendo wobuxoki ndiwuthiyile.

₁₂₉Ziyimisebenzi ebalulekileyo izingqiniso zakho,

Ngenxa yoko úzibambile umphefumlo wam.

₁₃₀Ukutyhila kwamazwi akho kuyakhanyisa,

Kuqondisa abazizidenge.

₁₃₁Ndakhamisa umlomo wam, ndakhefuza,

Ngokuba ndiyilangazelela imithetho yakho.

₁₃₂Ndíbheke, undibabale,

Ngokwesiko lakho kubathandi begama lakho.

₁₃₃Qinisa ukunyathela kwam ngentetho yakho,

Mabungabi nagunya kum ubutshinga, nabuphi na.

₁₃₄Ndíkhulule ekucudiseni komntu,

Ndizigcine iziyalezo zakho.

₁₃₅Khanyisa ubuso bakho kumkhonzi wakho,

Undifundise imimiselo yakho.

₁₃₆Ahla imijelo yamanzi amehlo am,

Ngenxa yokuba bengawugcini umyalelo wakho.

₁₃₇Ùlilungisa wena, Yehova,

Zithe tye izigwebo zakho.

₁₃₈Uzimisile izingqiniso zakho, zanobulungisa,

Zaba nokuthembeka kakhulu.

₁₃₉Ikhwele lam lindibhangisile,

Ngokuba abandibandezelayo bewalibele amazwi akho.

₁₄₀Ilizwi lakho linyibilikisiwe njengegolide kunene,

Umkhonzi wakho uyalithanda.

₁₄₁Ndimncinane, ndideliwe,

Noko andizilibali iziyalezo zakho.

₁₄₂Ubulungisa bakho bubulungisa obungunaphakade,

Umyalelo wakho uyinyaniso.

₁₄₃Imbandezelo nengcutheko indifumene,

Imithetho yakho iyandiyolisa.

₁₄₄Zinobulungisa ngonaphakade izingqiniso zakho,

Ndíqondise, ndiphile.

₁₄₅Ndikhala ngentliziyo yonke, ndíphendule;

Yehova, imimiselo yakho ndiya kuyibamba.

₁₄₆Ndikhala kuwe, ndísindise,

Ndigcìne izingqiniso zakho.

₁₄₇Ndakúphangela ukusa, ndazibika,

Ndalindela emazwini akho.

₁₄₈Amehlo am áphengela imilindo yasebusuku,

Ukuze ndicamngce ngentetho yakho.

₁₄₉Líve ilizwi lam ngokwenceba yakho,

Yehova, ndíphilise ngokwamasiko akho.

₁₅₀Bayasondela abaphuthuma amanyala,

Banyawuka emyalelweni wakho;

₁₅₁Ùsondele wena, Yehova,

Yonke imithetho yakho iyinyaniso.

₁₅₂Kudala ndisazi ngokwezingqiniso zakho,

Ukuba uzisekile ngonaphakade.

₁₅₃Khangela ukucinezeleka kwam, undihlangule,

Ngokuba ndingawulibali umyalelo wakho.

₁₅₄Bambana nobambene nam, undikhulule,

Ndíphilise ngokwelizwi lakho.

₁₅₅Lunyawukile kwabangendawo usindiso,

Ngokuba abayifuni imimiselo yakho.

₁₅₆Iimfesane zakho zininzi, Yehova;

Ndíphilise ngokwamasiko akho.

₁₅₇Baninzi abandisukelayo nabandibandezelayo;

Àndithi gu bucala ezingqinisweni zakho.

₁₅₈Ndababona abatshinizi, ndakruquka,

Abo bangàyigciniyo intetho yakho.

₁₅₉Bóna ukuthanda kwam iziyalezo zakho,

Yehova, ndíphilise ngokwenceba yakho.

₁₆₀Isimbuku selizwi lakho siyinyaniso iphela,

Zingunaphakade zonke izigwebo zobulungisa bakho.

₁₆₁Abathetheli bandisukela ngelizé,

Intliziyo yam iyankwantyiswa ngamazwi akho.

₁₆₂Ndinemihlali ngentetho yakho,

Njengofumene ixhoba elininzi.

₁₆₃Ndikuthiyile ukuxoka, lisikizi kum;

Ndiyawuthanda umyalelo wakho.

₁₆₄Ndikudumisa kasixhenxe ngemini,

Ngenxa yezigwebo zobulungisa bakho.

₁₆₅Banoxolo olukhulu abawuthandayo umyalelo wakho;

Akukho sikhubekiso kubo.

₁₆₆Ndikhangela usindiso lwakho, Yehova;

Ndenza imithetho yakho.

₁₆₇Umphefumlo wam uyazigcina izingqiniso zakho,

Ndizithanda kunene.

₁₆₈Ndiyazigcina iziyalezo zakho nezingqiniso zakho,

Ngokuba zonke iindlela zam ziphambi kwakho.

₁₆₉Makusondele phambi kwakho ukuhlahlamba kwam;

Yehova, ndíqondise ngokwelizwi lakho.

₁₇₀Masifike isikhungo sam phambi kwakho;

Ndíhlangule ngokwentetho yakho.

₁₇₁Umlomo wam mawumpompoze indumiso,

Kuba ùndifundisile imimiselo yakho.

₁₇₂Ulwimi lwam luya kuyiphendula intetho yakho,

Ngokuba yonke imithetho yakho inobulungisa.

₁₇₃Isandla sakho masibe sesokundinceda,

Ngokuba ndizinyuléle iziyalezo zakho.

₁₇₄Ndilangazelela usindiso lwakho, Yehova;

Umyalelo wakho uyandiyolisa.

₁₇₅Mawuphile umphefumlo wam, ukudumise,

Andincede amasiko akho.

₁₇₆Ndiya ndimka njengemvu elahlekileyo; mfune umkhonzi wakho,

Ngokuba andiyilibali imithetho yakho.