IINDUMISO 139

₁Yehova, ùndigocagocile, wandazi.

₂Wena uyakwazi ukuhlala kwam nokusuka kwam;

Uyaziqonda izicamango zam nakude.

₃Ukuhamba kwam nokulala kwam, ùyakwela;

Uqhelene neendlela zam zonke.

₄Ngokuba akukho lizwi elulwimini lwam

Ongalaziyo ke, Yehova, kanye.

₅Ngasemva nangaphambili undingqingile,

Wasibeka phezu kwam isandla sakho.

₆Kubalulekile kum oko kwazi,

Kuphezulu, kundinqabele.

₇Ndingahambela phi na ukumka emoyeni wakho?

Ndingabalekela phi na ukumka ebusweni bakho?

₈Ukuba ndithe ndenyuka ndaya emazulwini, ùlapho wena;

Ukuba ndithe ndazandlalela kwelabafileyo, nanko ukho.

₉Ukuba ndithe ndaphakamisa amaphiko esifingo,

Ndaya ndahlala ekupheleni kolwandle,

₁₀Besingandikhaphayo kwanalapho isandla sakho,

Sindibambe isandla sakho sokunene.

₁₁Ukuba ndithe, Mabundisongele ubumnyama bona bodwa,

Nokukhanya kube bubusuku ngeenxa zonke kum:

₁₂Kwanobumnyama obo abungebi bubumnyama kuwe;

Ubusuku bungába mhlophe njengemini,

Ubumnyama bungába njengokukhanya

₁₃Ngokuba wena wazibumba izintso zam,

Wandibiyela esizalweni sikama.

₁₄Ndiyabulela kuwe ngenxa enokuba ndenziwe ngokoyikekayo, ngokubalulekileyo;

Zibalulekile izenzo zakho,

Umphefumlo wam úyazi kakuhle.

₁₅Ayengàgushekile kuwe amathambo am,

Mna ndenzelwáyo entsithelweni,

Ndalukwa ndayimfakamfele ezinzulwini zomhlaba.

₁₆Amehlo akho andibona ndiseyimbumba,

Zazibhalwe encwadini yakho iimini zonke ziphela;

Ziyiliwe ngenxa engaphambili,

Kungekabikho ke nanye kuzo.

₁₇Kum ke zinjani na ukunqaba izicamango zakho, Thixo!

Àsinganganí isimbuku sazo!

₁₈Zingáthi, ndizibalile, zibe ninzi ngaphezu kwentlabathi;

Ndakuvuka ndoba ndisenawe.

₁₉Ngamana wambulala ongendawo, Thixo!

Nina madoda amagazi, sukani kum.

₂₀Abo bakukhankanyela amayelenqe,

Balibizela inkohlakalo igama lakho abazondi bakho.

₂₁Andinakubathiya na abakuthiyayo, Yehova,

Ndikruquke ngabasukela phezulu kuwe?

₂₂Ndibathiya ngentiyo ephelelisileyo,

Kum mna baziintshaba.

₂₃Ndígocagoce, Thixo, uyàzi intliziyo yam;

Ndícikide, uzàzi iingcinga-ngcinga zam;

₂₄Ubòne ukuba kukho ndlela yobubi na kum,

Undikhaphele kwindlela engunaphakade.