IINDUMISO 44

₁Thixo, sivile ngeendlebe zethu, oobawo basibalisela,

Ngomsebenzi owawenza ngemihla yabo, ngemihla yamandulo:

₂Okokuba isandla sakho sagqogqa iintlanga, sabatyala bona;

Saviva izizwe, sabanabisa bona.

₃Ngokuba àbalihluthanga ilizwe ngekrele labo,

Àbazisindisanga ngengalo yabo;

Sisandla sakho sokunene, nengalo yakho, nokukhanya kobuso bakho;

Ngokuba wawunesisa kubo.

₄Wena unguKumkani wam, Thixo;

Yitsho lubekho usindiso kuYakobi.

₅Ngawe sobangqula abasibandezelayo;

Egameni lakho sobagqusha abasukela phezulu kuthi.

₆Ngokuba àndikholose ngasaphetha sam;

Andisindiswa ngakrele lam.

₇Hayi! Nguwe osisindisayo kwabasibandezelayo,

Ubadànise abasithiyileyo.

₈NgoThixo sidumisa imihla yonke,

Sibulele kwigama lakho ngonaphakade. (Phakamisani.)

₉Noko ke ùsihlambile, ùsihlazile,

Akwaphuma nemikhosi yethu.

₁₀Ùsibuyisé umva phambi kombandezeli;

Abasithiyileyo basiphangile okwabo.

₁₁Wasinikela njengeegusha ezidliwayo;

Wasichitha-chitha ezintlangeni;

₁₂Wathengisa ngabantu bakho, akwazuza,

Akwalinyusa ixabiso labo.

₁₃Wasenza isingcikivo kubamelwane bethu,

Isigculelo nesicukucezo kwabasijikelezileyo.

₁₄Wasenza umzekelo ezintlangeni,

Abokuhlunguzelelwa intloko ezizweni.

₁₅Yonke imihla ihlazo lam liphambi kwam,

Nokudana kobuso bam kundigubungele,

₁₆Ngenxa yezwi lomngcikivi nomnyelisi,

Ngenxa yokukhangela kotshaba nomphindezeli.

₁₇Oko konke kusifikele, asikulibalanga wena,

Asixokanga emnqophisweni wakho;

₁₈Ayibuyanga umva intliziyo yethu,

Ukunyathela kwethu akuthanga gu bucala emendweni wakho;

₁₉Ukuba usityumze endaweni yeempungutye,

Usigubungele ngethunzi lokufa.

₂₀Ukuba besililibele igama loThixo wethu,

Sazolulela kuthixo wasemzini izandla zethu,

₂₁Úbengayi kuyigoca-goca na uThixo loo nto,

Ngokuba ezazi iindawo ezifihlakeleyo zentliziyo?

₂₂Hayi, Ngenxa yakho sibulawa imihla yonke;

Kuthiwa siziigusha zokuxhelwa.

₂₃Vuka, ùlaleleni na, Nkosi yam?

Qabuka, ungasihlambi kuphele.

₂₄Ubusitheliselani na ubuso bakho,

Ukulibale ukucinezelwa kwethu, nokuxinwa kwethu?

₂₅Ngokuba úsibekeke eluthulini umphefumlo wethu,

Sanamathela emhlabeni isisu sethu.

₂₆Khawusuk' ume usincede,

Usikhulule ngenxa yenceba yakho.