IINDUMISO 59

₁Ndíhlangule ezintshabeni zam, Thixo wam,

Ndíse engxondeni kwabasukela phezulu kum.

₂Ndíhlangule kubasebenzi bobutshinga;

Ndísindise ebantwini abanamagazi.

₃Ngokuba nâbo bewulalela umphefumlo wam;

Baqukana ngam ábanamandla,

Kungekho lukreqo kum, kungekho sono kum, Yehova.

₄Ndingenabugwenxa nje, bagidimé baxhoba.

Vuka, undikhawulele, ubone.

₅Wena Yehova, Thixo wemikhosi, Thixo kaSirayeli,

Phapha, uzivelele zonke iintlanga;

Musa ukubayeka bonke abanginizayo bengábagqithi. (Phakamisani.)

₆Bayabuya ngokuhlwa, bayavungama njengezinja,

Bawuhamba-hambe umzi.

₇Nâbo belephuza amagwebu ngomlomo;

Ngamakrele emlonyeni wabo;

Ngokuba bathi, Kuva bani na?

₈Wena, Yehova, uyabahleka,

Ùyazigculela zonke iintlanga.

₉Mandla am, ndiya kulindela kuwe;

Ngokuba uThixo uyingxonde yam.

₁₀UThixo wam uya kundikhawulela ngenceba yakhe;

UThixo uya kundibonisa abandilaleleyo.

₁₁Musa ukubabulala, hleze balibale abantu bakowethu;

Babhadulise ngamandla akho, ubawise,

Ngweletshetshe yethu, Nkosi yethu.

₁₂Isono somlomo wabo lilizwi lemilebe yomlomo wabo;

Mababanjiswe likratshi labo,

Nangenxa yokushwabula nokuhanahanisa abakuthethayo.

₁₃Bágqibe ngobushushu; gqiba, bangabi sabakho;

Baqónde ukuba uThixo ngumlawuli kwaYakobi,

Wesa eziphelweni zehlabathi. (Phakamisani.)

₁₄Bayabuya ngokuhlwa, bayavungama njengezinja,

Bawuhamba-hambe umzi.

₁₅Bona babhadulela ukudla;

Ukuba bathe àbahlutha, balala apho.

₁₆Ke mna, ndiya kuvuma ngamandla akho,

Ndimemelele kwakusasa ngenceba yakho,

Kuba ubuyingxonde kum,

Nendawo endisabela kuyo ngemini yokubandezelwa kwam.

₁₇Mandla am, ndiya kukubethela uhadi;

Ngokuba uThixo yingxonde yam, nguThixo wam onenceba.