IINDUMISO 92

₁Kulungile ukubulela kuYehova,

Nokulibethela uhadi igama lakho, Wena usenyangweni;

₂Ukuyixela kwakusasa inceba yakho,

Nokunyanisa kwakho ebusuku,

₃Ngoweentambo ezilishumi nangomrhubhe,

Ngokulubetha uhadi ngofefe.

₄Ngokuba ùyandivuyisa, Yehova, ngomsebenzi wakho,

Ngezenzo zezandla zakho ndinokumemelela.

₅Azizikhulu izenzo zakho, Yehova!

Zinzulu kakhulu iingcinga zakho.

₆Isityhakala asinakwazi;

Isinyabi asikuqondi oko.

₇Ekudubuleni kongendawo njengomfuno,

Ekutyatyambeni kwabasebenzi bonke bobutshinga,

Kukuze batshabalale ngonaphakade.

₈Ke wena, Yehova, ungophezulu ngonaphakade.

₉Ngokuba ùyabona, iintshaba zakho, Yehova,

Ngokuba ùyabona, iintshaba zakho ziya kutshabalala;

Baya kuchithwa-chithwa bonke abasebenzi bobutshinga.

₁₀Ùyaluphakamisa uphondo lwam njengolwenqu;

Ndigalélwe ioli entsha.

₁₁Iliso lam liyababonela abandilalelayo,

Indlebe yam iyabeva abasukela phezulu kum benobubi.

₁₂Amalungisa aya kudubula njengesundu,

Aya kukhula njengomsedare• weLebhanon.

₁₃Etyelwe nje endlwini kaYehova,

Aya kutyatyamba ezintendelezweni zoThixo wethu.

₁₄Aya kuhluma eselenezimvi,

Aya kuba etyebile, eluhlaza;

₁₅Ukuze axele ukuba uthe tye uYehova,

Uliwa lam, kungekho bugqwetha kuye.