ISITYHILELO 18

Iwile, iwile iBhabheli enkulu,

Yaba likhaya leedemon, nentolongo yoomoya bonke abangcolileyo,

Nentolongo yeentaka zonke ezingcolileyo, ezithiyekileyo.

₃Ngokuba zonke iintlanga zisele kuyo iwayini yomsindo wobuhenyu bayo,

Nookumkani bomhlaba bahenyuza nayo,

Nabarhwebi bomhlaba baba zizityebi, ngamandla okuxhamla kwabo iziyolo zayo.

Phumani kuyo, bantu bam,

Ukuze ningadlelani nayo ngezono zayo,

Nokuze ningamkeliswa kwizibetho zayo.

₅Ngokuba izono zayo ziye zafikelela emazulwini,

Nezinto zayo zokungalungisi uzikhumbule uThixo.

₆Yibuyekezeni, njengoko nayo yanibuyekezayo,

Niyiphinde impinda ngokwemisebenzi yayo;

Indebe eyaniphithikezela yona, yiphithikezeleni impinda nani.

₇Yinikeni intuthumbo nesijwili, ngangoko yazizukisayo, yaxhamla iziyolo.

Ngokuba ithi entliziyweni yayo, Ndihleli ndingukumkanikazi,

Andimhlolokazi, andisayi kubona sijwili.

₈Ngenxa yoko ziya kufika ngamininye izibetho zayo,

Ukufa, nesijwili, nendlala.

Iya kutsha ngumlilo,

Ngokuba ligorha iNkosi uThixo, lowo uyigwebayo.

₉Ookumkani bomhlaba, abo bahenyuza nayo, baxhamla iziyolo nayo, baya kuyililela,

Bayimbambazelele, bakuwubona umsi wokutsha kwayo;

₁₀Bemi kude, ngenxa yokoyika intuthumbo yayo,

Besithi, Yeha, yeha, mzi mkhulu Bhabheli, mzi unamandla!

Ngokuba kufike ngaxa linye ukugwetywa kwakho.

₁₁Nabarhwebi bomhlaba baya kulila, benzé isijwili ngenxa yayo,

Ngokuba ingasathengwa bani impahla yabo yomkhombe:

₁₂Impahla yegolide, neyesilivere, neyelitye elinqabileyo, neyeeperile,•

Neyelinen ecikizekileyo, neyeengubo ezibomvu, neyesilika, neyeengubo ezimfusa,

Nomthi wonke ongumsedare,•

Nezitya zonke zeempondo zeendlovu,

Nezitya zonke zomthi onqabileyo kakhulu,

Nezobhedu, nezentsimbi, nezemarmore,•

₁₃Nesinamon,• neziqhumiso, namafutha aqholiweyo, nentlaka emhlophe,

Newayini, neoli, nomgubo ocoliweyo, nengqolowa,

Namaqegu, nezimvu, namahashe, neenqwelo,

Nemizimba nemiphefumlo yabantu.

₁₄Neziqhamo ezikhanukwa ngumphefumlo wakho zimkile kuwe,

Nazo zonke izinto ezityebileyo neziqaqambileyo zimkile kuwe;

Akusayi kuba sazifumana zona.

₁₅Abarhwebi bezo zinto, abo batyeba ngayo,

Baya kuma kude, ngenxa yokoyika intuthumbo yayo,

₁₆Belila, besenza isijwili, besithi,

Yeha, yeha, mzi mkhulu

Owawuthiwe wambu ngelinen ecikizekileyo, nengubo ebomvu, nengubo emfusa,

Uhonjiswe ngegolide, namatye anqabileyo, neeperile!

Ngokuba buphanziswe ngalixa linye ubutyebi obungaka.

₁₇Bonke abaqhubi-mikhombe, nayo yonke indibandiba esezinqanaweni,

Noomateloshe, nabo bonke abasebenza elwandle,

₁₈Bema kude, bamana bedanduluka, bakuwubona umsi wokutsha kwayo,

Besithi, Nguwuphi na ofana nalo mzi mkhulu?

₁₉Bagalela uthuli entloko,

Bamana bedanduluka, belila, besenza isijwili,

Besithi, Yeha, yeha, mzi mkhulu,

Apho baba nobutyebi khona bonke aba baneenqanawa elwandle, ngeento ezinqabileyo zawo!

Ngokuba ngalixa linye úphanzisiwe.

₂₀Wénzele imihlali, nina mazulu,

Nani bapostile• bangcwele, nani baprofeti;

Ngokuba uThixo eniphindezelele kuwo.

Iya kwenjiwa nje ke ukugadlelwa kwayo iBhabheli, umzi omkhulu, ingabi saba safunyanwa.

₂₂Isandi sababethi beehadi, neseemvumi, nesabagwali, nesabavuthelimaxilongo, asisayi kuba saviwa kuwe;

Neengcibi zonke zobungcibi bonke azisayi kuba safunyanwa kuwe;

Nesandi selitye lokusila asisayi kuba saviwa kuwe;

₂₃Nokukhanya kwesibane akusayi kuba sakhanya kuwe;

Nezwi lomyeni nelomtshakazi alisayi kuba saviwa kuwe;

Ngokuba abarhwebi bakho bebengamanene omhlaba;

Ngokuba zonke iintlanga zalahlekiswa kukukhafula kwakho.

₂₄Kuwo kwafunyanwa igazi labaprofeti, nelabangcwele,

Nelabo bonke abasikiweyo emhlabeni.