INGOMA YAZO IINGOMA 6

₁Iye phi na intánda yakho,

Wena nzwakazindini phakathi kweentokazi?

Ibheke ngaphi na intánda yakho,

Ukuze sikufunise?

₂Intánda yam ihle yaya emyezweni wayo, emityinweni yetyeleba,

Ukuba yalusele emyezweni, ukuba ikhe iinyibiba.

₃Mna ndingowentánda yam, nentánda yam yeyam yona;

Yalusela ezinyibibeni.

₄Ùyinzwakazi, wethu, njengeTirtsa,

Ùnomkhitha njengeYerusalem;

Wòyikeka njengemikhosi eneebhanile.•

₅Wasuse amehlo akho kum,

Ngokuba andiqwelile.

Iinwele zakho zinjengomhlambi weebhokhwe

Ezisemathambekeni aseGiliyadi.

₆Amazinyo akho anjengomhlambi weemazi zeegusha

Ezinyukayo, zivela ekuhlanjweni,

Zonke zizele amawele,

Kungekho ifelweyo kuzo.

₇Zinjengothanda lwerharnate iintlafuno zakho,

Ngaphaya kwesigqubuthelo sakho.

₈Bangamashumi amathandathu ookumkanikazi, angamashumi asibohzo amashweshwe,

Neentombi ezingenakubalwa.

₉Mnye yena olivukuthu lam oyingqibeleli yam;

Mnye yena kunina,

Umnyulwa walowo wamzaláyo.

Zambona iintombi, zathi únoyolo,

Bamdumisa ookumkanikazi namashweshwe.

₁₀Ngubani na lo uthi gqi njengesifingo,

Mhle njengenyanga,

Unyulu njengelanga,

Woyikeka njengemikhosi eneebhanile?

₁₁Bendihle ndaya emyezweni weminoti,•

Ukuba ndikhangele uhlaza lwesihlambo,

Ndikhangele ukuba umdiliya unamathupha na,

Imirharnate ityatyambile na.

₁₂Bendingazi ukuba umphefumlo wam undibeke

Ezinqwelweni zabantu bam, zamanene.

₁₃Buya, buya, mShulamikazi;

Buya, buya, sikubone.

Nibona ntoni na kumShulamikazi,

Njengokungathi kukuqamba kwabaMahanayim?