INGOMA YAZO IINGOMA 8

₁Akwaba ubunjengomnakwethu

Obesanya amabeke kama!

Bendingathi, ndíkufumene phandle, ndikwange,

Bangàndideli noko.

₂Bendiya kukuqhuba, bendiya kukusa endlwini kama;

Ubuya kundifundisa.

Bendiya kukuseza iwayini eqholiweyo,

Nencindi yomrharnate wam.

₃Isandla sayo sokhohlo besiya kuba phantsi kwentloko yam,

Esokunene sayo sindiwole.

₄Zintombi zaseYerusalem, ndiyanifungisa,

Ningáthini na ukuluvusa, ningáthini na ukuluvuselela uthando,

Lude luthande?

₅Ngubani na lo unyuka evela entlango,

Esayama intánda yakhe?

Ngaphantsi komapile lo ndákuvusa wena.

Khona apha waba nenimba ngawe unyoko,

Khona apha waba nenimba owakuzalayo.

₆Ndíbeke njengomsesane wokutywina entliziyweni yakho, njengomsesane wokutywina engalweni yakho.

Ngokuba uthando lunjengokufa, ukuba nengcwangu,

Ubukhwele bunjengelabafileyo, ukuba lukhuni;

Amalangatye abo ngamalangatye omlilo,

Ngamadangatye kaYehova.

₇Amanzi amaninzi akanakulucima uthando;

Imilambo ayinakuluntywilisela.

Ingafanelana indoda irhole bonke ubuncwane bendlu yayo ngenxa yothando,

Ingádelwa ideliwe.

₈Sìnomsakwethu omncinane,

Akakabi namabele.

Siya kuthini na ngomsakwethu,

Mini aganelweyo?

₉Ukuba uludonga yena,

Siya kwakha phezu kwalo uqoqo lwesilivere;

Ukuba ungumnyango,

Somrhaqa ngamaceba omsedare.•

₁₀Ndaba ludonga mna, namabele am anjengenqaba;

Ndaza emehlweni ayo ndaba njengofumene uxolo.

₁₁USolomon ubenesidiliya eBhahali-amon,

Isidiliya wasinikela kubagcini,

Ukuze elowo azise iwaka lesilivere ngesiqhamo saso.

₁₂Isidiliya sam, esisesam, sona siselulawulweni lwam;

Iwaka elo lelakho, Solomon;

Amakhulu amabini ngawabagcini besiqhamo saso.

₁₃Wena uhleliyo emiyezweni,

Amakholwane alibazela indlebe izwi lakho,

Ndívise.

₁₄Dloba, ntánda yam,

Uxelise ibhadi namankonyana amaxhama

Ezintabeni zobulawu.