1 IZikhronike 5

₁Amadodana kaRubeni, izibulo lika-Israyeli. Wayeyizibulo, kodwa ngenxa yokuba wangcolisa umbhede kayise, ubuzibulo bakhe banikwa amadodana kaJosefa, indodana ka-Israyeli, futhi akabhalwangwa nasezizukulwaneni njengezibulo. ₂Noma uJuda wayenamandla kunabafowabo, kwavela kuye umbusi, ubuzibulo nokho babungobukaJosefa. ₃Amadodana kaRubeni, izibulo lika-Israyeli: kwakunguHanokhi, uPhalu, uHezironi noKharmi.

₄Amadodana kaJoweli: kwakunguShemaya, uGogi, uShimeyi, ₅uMikha, uRewaya, uBhali, ₆noBhera, owathunjwa nguThiligathi Phileneseri, inkosi yase-Asiriya; wayengumholi wakwaRubeni.

₇Abafowabo nabo babebhalwe ngemindeni yabo, nangezizukulwane zabo: uJehiyeli, inhloko noZakhariya, ₈uBhela ka-Azazi kaShema kaJoweli, owayehlala e-Aroweri kwaze kwaba seNebho, noBhali Mehoni. ₉Wakha ngasempumalanga kwaze kwaba sekuqaleni kwehlane elisuka emfuleni iYufrathe, ngokuba imfuyo yabo yanda kwaGileyadi. ₁₀Emihleni kaSawule bahlasela amaHagiri, bawanqoba, base behlala emathendeni awo ngasempumalanga yalo lonke elakwaGileyadi.

₁₁Amadodana kaGadi ahlala maqondana nabo eBhashani, kwaze kwaba seSaleka. ₁₂Izinhloko kwakunguJoweli, owesibili kunguShafamu, kulandele uJahanayi noShafani. ₁₃Abafowabo babemi kanje ngokwezindlu zoyise: kwakunguMikhayeli, uMeshulamu, uShebha, uJorayi, uJakhani, uZiya no-Ebhere, beyisikhombisa sebebonke. ₁₄Laba babengamadodana ka-Abhihayili kaHuri kaJarowa kaGileyadi kaMikhayeli kaJeshishayi kaJahido kaBhuzi. ₁₅U-Ahi ka-Abhidiyeli kaGuni wayeyinhloko yezindlu zokhokho babo. ₁₆Bahlala kwaGileyadi eBhashani nasemizaneni yalo, nasemadlelweni wonke eSharoni, kwaze kwaba semingceleni yawo.

₁₇Bonke laba babhalwa ngezizukulwane zabo emihleni kaJothamu, inkosi yakwaJuda, nasemihleni kaJerobhowamu, inkosi yakwa-Israyeli.

₁₈Amadodana kaRubeni, nabakwaGadi, nengxenye yesizwana sakwaManase, kwakungamadoda anamandla, aphatha ihawu nenkemba, ansale umnsalo futhi eqeqeshelwe ukulwa, ayeyizi-44 760 aya empini, ₁₉ahlasela amaHagiri, noJethuri, noNafishi noNodabhi. ₂₀Ngesikhathi ethola usizo lokulwa nabo, amaHagiri anikelwa ezandleni zawo nabo bonke ababenawo, ngokuba akhala kuNkulunkulu empini, amncenga, ngoba ayemethemba. ₂₁Adla izinkomo zabo, amakamela ayizi-50 000, izimvu eziyizi-250 000, izimbongolo eziyizi-2 000, nabantu abayizi-100 000. ₂₂Kwawa abaningi bebulewe, ngoba impi yayingekaNkulunkulu. Ahlala endaweni yabo aze athunjwa.

₂₃Abantu ababeyingxenye yesizwana sakwaManase bahlala kulelo lizwe, kusukela eBhashani kuze kube seBhali Hermoni, eSeniri, nasentabeni iHermoni.

₂₄Nazi izinhloko zezindlu zokhokho babo: ngu-Eferi, u-Ishi, u-Eliyeli, u-Aziriyeli, uJeremiya, uHodaviya noJahidiyeli; babengamaqhawe anamandla, amadoda anegama futhi eyizinhloko zezindlu zokhokho babo.

₂₅Kepha baphambuka kuNkulunkulu wokhokho babo, balandela onkulunkulu babantu balelo lizwe, baphinga, uNkulunkulu ababhubhisa phambi kwabo. ₂₆UNkulunkulu ka-Israyeli wavusa umoya kaPhuli, inkosi yase-Asiriya, nomoya kaThiligathi Philineseri, inkosi yase-Asiriya, babathumba abakwaRubeni, abakwaGadi, nengxenye yesizwana sakwaManase, babayisa eHala, eHabhori, eHara, nasemfuleni iGozani, kuze kube namuhla.