U-Amose 2

“Ngenxa yeziphambeko ezintathu zabakwaMowabi,

impela, ngenxa yezine, angiyukuguquka,

ngokuba bashisa amathambo

enkosi yakwa-Edomi aba ngumcako.

₂Ngakho-ke ngiyakuthumela umlilo kwaMowabi,

uyakungqongqisa izinqaba eKeriyothi.

AbakwaMowabi bafele emsindweni,

kube ubumayemaye,

kukhale icilongo.

₃Ngiyakuqeda nya ngomehluleli wakhona,

ngibulale zonke izikhulu zakhe kanye naye,”

kusho uSimakade.

“Ngenxa yeziphambeko ezintathu zabakwaJuda,

impela, ngenxa yezine, angiyukuguquka,

ngokuba bawulahlile umthetho kaSimakade,

bangazigcina izimiso zakhe,

amanga abo abadukisa,

abawalandela nokhokho babo.

₅Ngakho-ke ngiyakuthumela umlilo kwaJuda,

uyakungqongqisa izinqaba eJerusalema.”

“Ngenxa yeziphambeko ezintathu zabakwa-Israyeli,

impela, ngenxa yezine, angiyukuguquka,

ngokuba bathengise olungileyo ngesiliva,

nompofu ngezimbadada ezimbili.

₇Bagxobagxoba amakhanda abampofu othulini lomhlabathi,

bachezukisa abathobekileyo endleleni;

indodana noyise baya entombini,

kanjalo-ke balihlambalaze iGama lami elingcwele.

₈Balala eceleni kwawo wonke ama-althare

ngezingubo ezithathwe zaba yisibambiso.

Baphuza iwayini labahlawulisiwe

endlini kaNkulunkulu wabo.

₉“Kodwa Mina ngawabhubhisa

ama-Amori phambi kwabo,

ayemade njengemisedari,

eqine njengemi-okhi,

ngaqeda nya ngesithelo sawo

kusukela phezulu

nangezimpande zawo phansi.

₁₀“Mina nganikhipha eGibhithe,

nganihola ehlane iminyaka engamashumi amane

ukuba nidle izwe lama-Amori.

₁₁Ngavusa amanye amadodana enu

aba ngabaphrofethi,

nezinye izinsizwa zenu

zaba ngamaNaziri.

Akunjalo yini bantu bakwa-Israyeli na?” kusho uSimakade.

₁₂“Kodwa naphuzisa amaNaziri iwayini,

nenqabela abaphrofethi, nithi:

‘Ningaphrofethi.’

₁₃Niyabona-ke, sengizonicindezela lapho phansi

njengenqola inyinyitheka okusanhlamvu.

₁₄Onejubane ngeke aphunyuke;

onamandla akayukuzihlenga ngamandla akhe,

neqhawe aliyukuyisindisa impilo yalo.

₁₅Obambe umnsalo eciba akayukuma;

ogijima ngezinyawo zakhe akayukusinda,

nogibele ihhashi akayukuyisindisa impilo yake.

₁₆Onesibindi kumaqhawe uyakubaleka enqunu

ngalolo lusuku,” kusho uSimakade.