IDutheronomi 32

₁“Lalelani nina mazulu,

ngiyakhuluma;

umhlaba mawuzwe amazwi omlomo wami.

₂Isifundiso sami masehle njengemvula,

inkulumo yami iconse njengamazolo,

njengomkhizo otshanini,

nanjengezihlambi ohlazeni,

₃ngokuba ngiyomemezela igama likaSimakade:

ngimnike udumo uNkulunkulu wethu.

₄“Uyidwala,

umsebenzi wakhe uphelele,

zonke izindlela zakhe zingukulunga;

unguNkulunkulu wokwethembeka ongenakonakala;

ulungile, uqotho Yena.

₅“Bonile kuye;

abaseyibo abantwana bakhe,

ngenxa yesici sabo;

bayisizukulwane esiphambeneyo nesiyisigwegwe.

₆Ngabe nimbonga kanjalo uSimakade, na?

Nina bantu abayiziwula nabangahlakaniphile,

akasiye yini uyihlo anidalwanga nguye

wanenza, wanimisa, na?

₇“Khumbula izinsuku zasendulo,

ubheke iminyaka yezizukulwane ngezizukulwane;

buza kuyihlo,

uyakukulandisa,

nezingwevu zizokutshela.

₈OPhezukonke lapho abela izizwe ifa lazo,

lapho ehlukanisela abantwana babantu,

wamisa imingcele yezizwe

ngokwenani labantu bakwa-Israyeli.

₉Ngokuba isabelo sikaSimakade singabantu bakhe.

UJakobe uyisifunda sefa lakhe.

₁₀“Wamthola ezweni eliyihlane,

nasoqwathuleni lomkhulungwane kwahlongasibi,

wamzungeza,

wamnakekela,

wamgcina njengenhlamvu yeso lakhe.

₁₁Njengokhozi lunyakazisa isidleke salo,

lubhakuza phezu kwamaphuphu alo,

welula amaphiko akhe,

wabathatha,

wabathwala ngamaphikho akhe.

₁₂NguSimakade kuphela owamqondisa,

akukho nkulunkulu wabezizwe onaye.

₁₃“Wamkhweza ezindaweni eziphakemeyo zomhlaba,

wadla izithelo zamasimu,

wammuncisa uju edwaleni,

namafutha eweni lensengetsha.

₁₄Wadla izaqheqhe zemihlambi,

ubisi lwezimvu,

amafutha amawundlu,

izinqama zohlobo lwaseBhashani,

izimbuzi,

namanoni kakolo wekhethelo;

waphuza iwayini livela egazini lamagilebhisi.

₁₅“UJeshuruni wakhuluphala,

wayesekhahlela;

usekhuluphele,

uzimukile,

futhi uchachambile.

Wamshiya uNkulunkulu owamenza,

waledelela iDwala lensindiso yakhe.

₁₆Bamenza waba nesikhwele

ngonkulunkulu babezizwe,

bamthukuthelisa ngezinengiso.

₁₇“Bahlabela amadimoni angeyena uNkulunkulu,

nonkulunkulu abangazange babazi,

onkulunkulu abasha,

abasanda kuhlangabezana nabo,

nababengaziwa ngokhokho babo.

₁₈Walikhohlwa iDwala elakuzalayo,

wamkhohlwa uNkulunkulu owakudalayo.

₁₉“USimakade wakubona lokho,

wanengwa ngukuchukuluzwa

ngamadodana

namadodakazi akhe.

₂₀Wathi:

‘Ngizobufihla ubuso bami kubo,

ngibone ukuthi sizoba yini isiphetho sabo;

ngokuba bayisizukulwane esiphambeneyo,

nabantwana okungekho ukwethembeka kubo.

₂₁Bangenze nganesikhwele ngokungesiye uNkulunkulu,

bangithukuthelisa ngokuyize kwabo;

ngiyobenza babe nesikhwele

ngabangesiso isizwe, ngibathukuthelise

ngesizwe esiyisiwula.

₂₂Ngokuba umlilo

uphenjwe yintukuthelo yami;

uyabhebhetheka kuze

kube sendaweni yabafileyo engaphansi,

uyaqothula umhlaba nezithelo zawo,

wokhela nezisekelo zezintaba.

₂₃“ ‘Ngiyonqwabelisa izinhlekelele phezu kwabo

ngibacibe ngemicibisholo yami:

₂₄bayakuphela amandla yindlala,

baqedwe wubhubhane,

baqothulwe yisifo esibi,

ngibathumele ngezinzawula zezilwane zasendle

ezinesihlungu nezihuquzela othulini, zibalume.

₂₅Emigwaqweni inkemba iyodla lubi,

emakamelweni kubhoke uvalo:

ezinsizweni nasezintombini,

koncelayo nasempungeni.

₂₆Ngathi:

“Ngizobavithiza babe yizicucu

ngiqede ukukhunjulwa kwabo

kubantu,”

₂₇kungenjalo, ngesaba ukuchukuluzwa yisitha,

funa abamelene nabo baqonde, bathi:

“Izandla zethu eziphakamile,

akusiye uSimakade owenze konke lokhu.” ’ ”

₂₈“Bayisizwe esingenangqondo,

akukho ukuqonda kubo.

₂₉Uma bebehlakaniphile

bebeyakukuqonda lokhu,

baqonde nesiphetho sabo.

₃₀Oyedwa angayixosha kanjani inkulungwane,

ababili bahubhe izinkulungwane ezilishumi,

uma idwala labo belingathengisanga ngabo,

uSimakade ebengabanikelanga, na?

₃₁Impela idwala labo

alifani neDwala lethu;

nezitha zethu ziyakuvuma lokho.

₃₂Umvini wabo ungumvini waseSodoma

ovela emasimini aseGomora;

izithelo zawo ziwubuthi,

amahlukuzo awo amuncu.

₃₃Iwayini labo liyisihlungu sezinyoka,

lingubuthi bemfezi.

₃₄Lokho akugciniwe yini kimi,

kwavalelwa ezinqolobaneni zami, na?

₃₅Impindiselo ingeyami,

nokunxephezela kungokwami,

lapho unyawo lwabo lushelelela okwesikhashana,

ngokuba usuku lwabo lwenhlekelele selusondele,

izinto abalungiselelwe zona

uyozenza zifike ngokushesha kubo.

₃₆“USimakade uyobehlulela abantu bakhe,

abe nesihawu ezincekwini zakhe,

lapho ebona ukuthi

amandla abo aphelile,

akusekho oboshiweyo nokhululekileyo.

₃₇Uyakuthi: ‘Baphi onkulunkulu babo,

nedwala ababephephela kulo,

₃₈ababedla amanoni emihlatshelo yabo,

bephuza iwayini lomnikelo wabo

wokuphuzwayo, na?

Mabanisize,

mababe yisiphephelo senu.

₃₉“ ‘Bonani manje

ukuthi Mina,

yebo, Mina Nginguye,

akekho unkulunkulu ngaphandle kwami;

Mina ngiyabulala,

ngibuye ngiphilise,

ngilimaze,

futhi ngipholise;

akekho ongabahlenga esandleni sami.

₄₀Ngiphakamisela isandla sami ezulwini,

ngithi: Mina ngiyakuphila

kuze kube phakade.

₄₁Uma ngilola inkemba yami ebengezelayo,

isandla sami sibambelele ekwehluleleni,

ngiyophenduka ngiphindisele kwabamelene nami,

ngiphindisele kwabangizondayo.’ ”

₄₂“Imicibisholo yami

ngiyoyidakisa ngegazi,

inkemba yami idle abantu,

ngegazi lababuleweyo nabathunjiweyo,

kuqala enhlokweni yabaholi bezitha.

₄₃Memezani ngokuthokoza bantu bakhe,

nina zizwe,

ngokuba uyakuliphindiselela

igazi lezinceku zakhe,

aziphindiselele kwabamelene naye,

ahlambulule izwe lakhe nabantu bakhe.”