UHezekeli 17

₁Izwi likaSimakade lafika kimi, lathi: ₂“Ndodana yomuntu, banike imfumbe, ukhulume ngomfanekiso kuyo indlu yakwa-Israyeli, ₃uthi: ‘Isho kanje iNkosi uSimakade, ithi: “Ukhozi olukhulu olunamaphiko amakhulu nezimpaphe ezinkulu, lunezimpaphe eziningi ezinemibala eyehlukeneyo, lwafika eLebhanoni, lwathatha isihloko somsedari, ₄lwanquma igatsha elisha eliphezulu, lwaluyisa ezweni labahwebi, lwalubeka emzini wabathengi.

₅“ ‘ “Lwathatha embewini yezwe, lwayoyitshala emhlabathini ovundileyo, lwayihlwanyela ngasemanzini amaningi, lwayitshala njengomnyezane. ₆Yamila yaba ngumvini owenabayo, nokho omfushane, ukuze amagatsha awo abheke ngakuwo, nezimpande zawo zibe phansi kwawo. Waba ngumvini-ke, waba namagatsha, kwavela amahlumela.

₇“ ‘ “Kepha kwafika olunye ukhozi olukhulu futhi, lunamaphiko amakhulu nezimpaphe eziningi. Lo mvini-ke wabhekisa izimpande zawo ngakulo, amagatsha awo lwawenabisela kulo ukuze luwunisele, lapho wawutshalwe khona. ₈Wawusemhlabathini omuhle ngasemanzini amaningi ukuba uveze amagatsha, uthele izithelo, ube ngumvini omuhle.” ’ ”

₉“Batshele uthi: ‘Isho kanje iNkosi uSimakade, ithi: “Ngabe uyakuphumelela na? Ukhozi aluyukuzisiphula yini izimpande zawo, lunqume izithelo zawo, ukuze ubune, kubune wonke amaqabunga abehlume kuwo, bese kungadingeki amandla amakhulu nabantu abaningi ukuba usishulwe nezimpande zawo na? ₁₀Pho lapho usutshaliwe, uyakuphumelela yini na? Awuyukubuna nokubuna yini lapho ushaywa ngumoya wasempumalanga, lapho utshalwe khona na?” ’ ”

₁₁Izwi likaSimakade lafika kimi, lathi: ₁₂“Ake ukhulume kuyo indlu ka-Israyeli ehlubukayo, uthi: ‘Anazi yini ukuthi lezi zinto ziyini na?’ Yisho uthi: ‘Inkosi yaseBhabhele yaya eJerusalema, yathumba inkosi yalo nezikhulu zakhona, yaziyisa kanye nayo eBhabhele. ₁₃Yayisithatha owozalo lwasebukhosini, yenza naye isivumelwano, yamfungisa, yathumba nabaholi balelo lizwe, ₁₄ukuze umbuso uthotshiswe, ungaziphakamisi, kodwa uqhubeke nokugcina isivumelwano sakhe. ₁₅Kepha inkosi yayivukela inkosi yaseBhabhele ngokuthumela izithunywa zayo eGibhithe, ukuba ithole amahhashi nabantu abaningi. Uyophumelela yini na? Uyophunyuka yini owenza lezi zinto? Uyophunyuka yini owephula isivumelwano na?

₁₆“ ‘Ngifunga ngiyagomela,’ ” kusho iNkosi uSimakade, “ ‘impela endaweni yenkosi eyambeka waba yinkosi, wedelela isifungo sayo, wasaphula isivumelwano sayo; naye uyakufela khona eBhabhele. ₁₇UFaro, ngempi yakhe enkulu nebandla elikhulu analo, akayukumsiza empini, nalapho kwenziwa indunduma, kwakhiwa udonga lokuvimbezela ukuze kubulawe abantu abaningi. ₁₈Ngokuba wedelele isifungo ngokwephula isivumelwano, wenza konke lokho nakuba ethembisile; ngakho-ke akayukuphunyuka.

₁₉“ ‘Ngakho-ke’ ” isho kanje iNkosi uSimakade, ithi: “ ‘Ngifunga ngiyagomela, impela isifungo sami asedeleleyo, nesivumelwano sami asaphulileyo; ngiyakukwehlisela phezu kwekhanda lakhe. ₂₀Ngiyakwendlala inetha lami phezu kwakhe, abanjwe ogibeni lwami, ngimyise eBhabhele, ngimehlulele khona lapho ngokungethembeki kwakhe kimi. ₂₁Kuyakuthi bonke ababalekayo bempi yakhe, bawe ngenkemba, kuthi abasindileyo bahlakazelwe kuzo zonke izindawo, kulapho-ke niyokwazi ukuthi Mina Simakade ngikhulumile.’

₂₂“Isho kanje iNkosi uSimakade, ithi: ‘Mina luqobo, ngiyakuthatha esihlokweni somsedari omude, ngitshale, nginqume emagatsheni amasha aphezulu, elithambileyo, ngilitshale entabeni ende ephakemeyo, ₂₃ngilitshale esicongweni sentaba yakwa-Israyeli; lihlume amagatsha, lithele izithelo, libe ngumsedari omuhle; kuhlale phansi kwamagatsha awo zonke izinyoni ezinhlobonhlobo, zihlale emthunzini wamagatsha awo. ₂₄Zonke izihlahla zasendle ziyakukwazi ukuthi Mina Simakade ngenza isihlahla eside sibhashe kuthi esibhashile ngisenze sikhule sibe side. Ngiyasomisa isihlala esiluhlaza, bese ngisihlumisa esomileyo sibe luhlaza.

“ ‘Mina Simakade ngikhulumile futhi ngiyakukwenza lokho.’ ”