IGenesisi 12

₁USimakade wathi ku-Abhrama: “Phuma ezweni lakini, nasezihlotsheni zakho, nakwabendlu kayihlo, uye ezweni engizokukhombisa lona. ₂Ngizokwenza ube yisizwe esikhulu, ngikubusise, ngikunike udumo, wena ube yisibusiso. ₃Ngiyakubabusisa abakubusisayo, ngibaqalekise abakuqalekisayo. Yonke imindeni yomhlaba iyakubusiswa ngawe.”

₄U-Abhrama wayeneminyaka engama-75 ngesikhathi eqala uhambo lwakhe njengalokhu uSimakade ayemtshelile; wahamba noLothi, balifulathela iHarana. ₅Wathatha umkakhe uSarayi, noLothi indodana yomfowabo, nayo yonke impahla ababenayo, nezinceku ababezitholile eHarana, babhekisa amabombo eKhanani.

Sebefikile eKhanani, ₆u-Abhrama wadabula kulo waze wafika eShekhemu nasemu-okhini eMore. Ngaleso sikhathi kulelo lizwe kwakusakhe amaKhanani. ₇USimakade wazibonakalisa ku-Abhrama, wathi: “Leli lizwe ngiyolinika isizukulwane sakho.”

U-Abhrama wayesakha lapho i-althare likaSimakade owayezibonakalise kuye.

₈Wasuka lapho waya kwelezintaba empumalanga yeBhethele, wagxumeka ithende lakhe lapho. IBhethele yayingasentshonalanga, i-Ayi ingasempumalanga. Kulapho-ke akhela khona uSimakade i-althare, wakhuleka egameni likaSimakade. ₉Wayesekhukhula njalo waze wayofika eningizimu.

₁₀Kwase kuhlasela indlala eKhanani, u-Abhrama wayesehlela eGibhithe ukuyogogobala khona, ngokuba indlala yayidlangile ezweni lakubo. ₁₁Kuthe lapho sebezongena eGibhithe wayesethi kumkakhe uSarayi: “Ngazi kahle ukuthi ungowesifazane omuhle kakhulu. ₁₂Kuyothi uma amaGibhithe ekubona athi: ‘Ngumkakhe lo.’ Bese mina engibulala, kodwa wena akuyeke uphile. ₁₃Ubowatshela ukuthi ungudadewethu, khona ezongiphatha kahle ukuze ngisinde ngenxa yakho.”

₁₄Ekufikeni kuka-Abhrama eGibhithe, amaGibhithe ambona owesifazane ukuthi muhle ngokwedlulele. ₁₅Izikhulu zikaFaro nazo zambona zamncoma kuFaro, wayeselethwa esigodlweni sakhe. ₁₆UFaro wamphatha kahle u-Abhrama ngenxa yomkakhe, wamxoshisa ngezimvu, izinkomo, izimbongolo, amakameli, izinceku nezincekukazi.

₁₇USimakade washaya uFaro nabendlu yakhe ngobhubhane ngenxa kaSarayi umka-Abhrama. ₁₈UFaro wayesebiza u-Abhrama wathi kuye: “Yini le nto oyenze kimi na? Awungitshelanga ngani ukuthi ungumkakho na? ₁₉Usholoni ukuthi ungudadewenu ngaze ngamthatha ukuba abe ngumkami na? Manje-ke nangu umkakho. Mthathe uhambe.”

₂₀UFaro wayeseyaleza abantu bakhe ukuba babakhombe indlela ababeze ngayo o-Abhrama nomkakhe nakho konke ayenakho.