UHoziya 6

₁“Wozani, masibuyele kuSimakade,

ngokuba Yena usidwengulile;

uyakusiphulukisa;

Yena usishayile,

uyakubopha inxeba lethu.

₂Uyakusiphilisa emva kwezinsuku ezimbili,

asivuse ngosuku lwesithathu,

siphile ebukhoneni bakhe.

₃Masimazi, siphokophelele ukumazi uSimakade;

ukuphuma kwakhe kuqinisekile njengentathakusa,

uyakufika kithi njengemvula,

njengemvula yasentwasahlobo ematisa umhlaba.

₄“Ngiyakwenzani ngawe Efrayimi na?

Ngiyakwenzani ngawe Juda na?

Uthando lwenu lunjengomlalamvubu ekuseni,

nanjengamazolo asekuseni eshabalala.

₅Ngakho-ke ngibaqobaqoba babe zicubu ngabaphrofethi,

ngibabulale ngamazwi omlomo wami,

ukwehlulela kwami kuphume njengokukhanya.

₆Ngokuba Mina ngifuna ukwethembeka,

hhayi umhlatshelo,

nolwazi ngoNkulunkulu kuneminikelo yokushiswa.

₇Kodwa basephulile isivumelwano njengo-Adamu;

bangathembeka kimi ngalokho.

₈IGileyadi lingumuzi wabenza inkohlakalo,

limabhadubhadu yigazi.

₉Njengeqembu labaphangi lilalele umuntu unyendle,

kanjalo neqembu labaphristi

liyabulala endleleni eya eShekhemu,

impela benza inkohlakalo.

₁₀Ngibone into ehlasimulisayo

endlini yakwa-Israyeli:

kukhona ubufebe kwa-Efrayimi,

u-Israyeli uzingcolisile.

₁₁“Nawe Juda, ulungiselwe ukuvunwa,

lapho ngibuyisa ukuthunjwa kwabantu bami.”