U-Izaya 47

₁“Yehla, uhlale othulini,

ntombi eyindodakazi yaseBhabhele.

Hlala phansi emhlabathini

ngaphandle kwesihlalo sobukhosi,

ndodakazi yamaKhaledi!

Ngokuba awusayukuphinde

ubizwe ngothambileyo nontengantengayo.

₂Thatha amatshe okusila,

ugaye impuphu,

susa imvakazi yakho,

ukhumule ingubo yakho,

wembule imilenze,

uwele imifula.

₃Ubunqunu bakho mabuvele obala

libonakale ihlazo lakho,

ngiyoziphindiselela,

angiyukushiya noyedwa.

₄UMhlengi wethu igama lakhe

nguSimakade Wamabandla

oNgcwele ka-Israyeli.

₅“Hlala uthule,

uhambe ebumnyameni,

ndodakazi yamaKhaledi,

ngokuba awusayukuphinde

ubizwe ngendlovukazi yemibuso.

₆Ngangibathukuthelele abantu bami,

ngangcolisa ifa lami,

ngalinikela esandleni sakho;

awubahawukelanga,

walenza ijoka lakho

ukuba lisinde kakhulu

phezu kwabadala.

₇Wathi wena:

‘Ngiyohlala ngiyindlovukazi,

kuze kube phakade.’

Ngalokho awubekanga

lezi zinto enhliziyweni yakho,

awukhumbulanga isiphetho sazo.

₈“Manje yizwa lokhu,

wena ozijabulisayo,

ohlala ulondekile,

othi enhliziweni yakho:

yimi, akekho omunye;

angiyukuhlalisa okomfelokazi,

futhi angiyukukwazi ukufelwa ngabantwana.

₉Kodwa kokubili lokhu

kuyokwehlela ngokuphazima kweso

ngalusuku lunye,

ukufelwa ngabantwana

nokuba ngumfelokazi

kuyokwehlela ngokupheleleyo,

phezu kobuningi babalumbi bakho,

namalumbo akho edlula ukwenza.

₁₀Ubuzizwa uvikelekile ebubini bakho,

waze wathi:

‘Akekho ongibonayo.’

Ukuhlakanipha nokwazi kwakho kukudukisile;

wathi enhliziyweni yakho:

‘Yimi, yimi kuphela, akekho omunye.’

₁₁Kodwa ububi buyakukwehlela,

awuyukwazi lapho buvela khona;

nengozi iyakuwela phezu kwakho,

awuyukuba namandla okuyivika;

incithakalo iyokwehlela phezu kwakho

ngokuzumayo, ungazi.

₁₂“Yima uqine ebuthakathini bakho,

nasemalumbeni akho amaningi

obukusebenza kusukela ebusheni bakho,

mhlawumbe uzosizakala,

mhlawumbe uyokwazi ukudala uvalo.

₁₃Ukhathele ngenxa yobuningi bamacebo akho;

mabasukume, bakusindise abadabula izulu,

nababheka izinkanyezi,

nabazisa ngezinyanga ezintsha,

ukuthi kukuphi lapho kuzovela khona

lokhu okuzokwehlela.

₁₄Bheka, sebefana namabibi eshiswa ngumlilo,

abakwazi ukuzisindisa emandleni elangabi,

akusilo ilahle lokuba lothiwe,

akusiwo nomlilo wokuba uwothe.

₁₅Zinjalo-ke kuwe lezo zinto obuzikhandlekela,

ebezihambisana nawe kwasebusheni bakho,

yileyo naleyo iyazulazula endleleni yayo,

ayisekho engakusiza.”