UJeremiya 49

“Kanti u-Israyeli akanamadodana, akanandlalifa na?

Kungani inkosi yabo idle elakwaGadi,

nabantu bayo bahlala emizini yakhona na?

₂Ngakho-ke bheka,

izinsuku ziyeza,” kusho uSimakade,

“lapho ngiyakwenza ukuba

kuhlatshwe umkhosi wempi

eRabha labakwa-Amoni.

Liyophenduka indunduma yencithakalo,

imizana yalo ishiswe ngomlilo;

u-Israyeli uyokwephuca

labo ababedle ifa lakhe,” kusho uSimakade.

₃“Khihla isililo, Heshibhoni,

ngokuba i-Ayi ibhujisiwe,

khalani, madodakazi aseRabha,

nibhince indwangu eyisaka;

nilile, nigijime phakathi kwezingange,

ngokuba inkosi yalo izothunjwa,

nabaphristi balo nezikhulu zalo, kanyekanye.

₄Uzigqajelani ngezigodi,

ngesigodi sakho esivundileyo,

wena ndodakazi ehlubukayo,

othembele engcebeni yakho, uthi:

‘Ngubani ongangihlasela na?’

₅Bheka, ngizokwehlisela ukwesaba phezu kwakho,”

kusho iNkosi uSimakade Wamabandla,

“kuvela kubo bonke abakuzungezileyo;

niyakuxoshwa;

kube yilowo nalowo abambe eyakhe indlela,

kungabi bikho oqoqa ababalekileyo.

₆“Kepha emveni kwalokho

ngiyakuguqula ukuthunjwa kwabakwa-Amoni,” kusho uSimakade.

“Akusekho yini ukuhlakanipha eThemani na?

Sekuphelile yini ukweluleka kwabanokuqonda na?

Ngabe ukuhlakanipha kwabo sekushabalele na?

₈Phendukani, nibaleke,

nibhace emigedeni ejulileyo;

nina zakhamuzi zaseDedani,

ngokuba ngiyakwehlisela phezu kwakhe inhlekelele ka-Esawu,

ngesikhathi engiyomjezisa ngaso.

₉Uma kufika kuwe abavuni bamagilebhisi,

abayukushiya mkhothozo yini na?

Uma kutheleka amasela ebusuku,

awayukuntshontsha yini lokho akudingayo na?

₁₀Kepha Mina, ngizomhlubula u-Esawu,

ngambule izindawo zakhe ezifihlekile

akayukukwazi ukucasha;

izizukulwane zakhe,

izihlobo zakhe,

nomakhelwane bakhe bayakubhujiswa,

baphele nya.

₁₁Zishiye izintandane zakho,

Mina ngizozigcina ziphilile;

abafelokazi bakho mabethembele kimi.”

₁₄Ngiwuzwile umbiko ovela kuSimakade,

kuthunywe isithunywa ezizweni sayokuthi:

“Qoqanani, nimelane nalo;

sukumani, nilungele ukulwa.”

₁₅“Ngokuba bheka,

ngizakukwenza ube mncane phakathi kwezizwe,

udelelwe phakathi kwabantu.

₁₆Ukwesabeka kwakho

nokuziqhenya kwenhliziyo yakho kukudukisile,

wena ohleli emifantwini yamadwala,

esicongweni segquma.

Noma isidleke sakho

ungasakha phezulu njengokhozi;

ngiyakwehlisa khona lapho,” kusho uSimakade.

₁₇“U-Edomi uyakuba yinto esabekayo,

kuthi bonke abedlulayo bamangale, banximfe

ngenxa yezinhlupheko zakhe.

₁₈Njengokuchithwa kweSodoma neGomora,

nemizi eyakhe ngakhona;

akuyukuhlala muntu lapho,

nendodana yomuntu ayiyukugogobala khona,” kusho uSimakade.

₁₉“Bheka, njengengonyama iphuma ehlozini eJordani,

iya emadlelweni aluhlaza,

ngiyakubazuma kanjalo abakwa-Edomi,

ngibaxoshe ezweni labo.

Noma ngubani okhethiweyo ngiyombeka ababuse.

Ngokuba ngubani onjengami na?

Ngubani ongangiphosela inselelo na?

Yimuphi umelusi ongama phambi kwami na?”

₂₀Ngakho-ke yizwani ngecebo likaSimakade;

ngo-Edomi nalokho akuhlosile ngabakhileyo eThemani:

impela abancinyane emhlanjini bayohudulwa basuswe,

abhubhise amadlelo abo ngenxa yabo.

₂₁Umhlaba uyakuzamazama ngomsindo wokuwa kwabo;

umsindo wokukhala kwabo kalusizi,

uzwakale oLwandle Lomhlanga.

₂₂Bheka, uyakukhuphuka ashwize njengokhozi,

ehle, elulele amaphiko akhe phezu kweBhozira.

Izinhliziyo zamaqhawe akwa-Edomi

ziyakufana nenhliziyo yowesifazane ohelelwayo.

“IHamathi ne-Ariphadi kujabhile,

kwaphela amandla,

ngokuba kuzwe izindaba ezimbi,

kukhathazekile njengolwandle, olungenakuthula.

₂₄IDamaseku lidikibele,

laphenduka labaleka;

ingebhe ilibambile,

ukudabuka nobuhlungu kulikhungethe

njengowesifazane obelethayo.

₂₅Yeka ukushiywa komuzi odumileyo,

umuzi wokuthokoza kwami!

₂₆Ngakho-ke izinsizwa zakhona

ziyakuwa ezindaweni ezivulekileyo,

nawo wonke amaqhawe empi

abulawe ngalolo lusuku,” kusho uSimakade Wamabandla.

₂₇“Ngiyakuphemba umlilo ogangeni lwaseDamaseku,

ungqongqise izinqaba zikaBheni Hadadi.”

“Khuphukelani eKhedari,

nibhubhise abantu basempumalanga.

₂₉Niyothatha, nithwale amathende abo,

imihlambi yabo, amakhethini abo,

nazo zonke izimpahla zabo,

amakameli abo,

nimemeze kubo nithi:

‘Kugcwele ukwesabeka nxazonke.’

₃₀“Bhembulukani nibaleke,

nizulazule kude,

nicashe emigedeni,

nina zakhamuzi zaseHazori, kusho uSimakade;

ngokuba uNebukhadinezari,

inkosi yaseBhabhele,

wenze icebo ngani;

unakhele uzungu,

waceba icebo,” kusho uSimakade.

₃₁“Sukani, nikhuphukele esizweni esizinzileyo,

esihlala ngokuvikeleka,

esingenamasango namigoqo,

esakhe sodwa,” kusho uSimakade.

₃₂“Amakamela aso ayakuba yimpango,

nemfuyo yaso eningi iyakuphangwa.

Ngiyakubahlakazela ezindaweni zonke,

bonke abadilingwe emaceleni amakhanda abo,

ngehlisele phezu kwabo

inhlekelele evela nxazonke,” kusho uSimakade.

₃₃“IHazori liyakuba yindawo

ehlala amakhanka nencithakalo,

kuze kube phakade.

Akuyukuhlala muntu khona,

nendodana yomuntu ayiyukugogobala khona.”

“Bheka, ngiyakuwephula umnsalo we-Elamu,

isiqalo samandla abo.

₃₆Ngiyakwehlisela phezu kwe-Elamu

imimoya emine evela

emkhawulweni yomine yezulu,

ngibahlakazele kuyo yonke leyo mimoya,

akuyukuba bikho sizwe

lapho abaxoshiweyo base-Elamu

bengayikufika khona.

₃₇Ngiyakuyivithiza i-Elamu phambi kwezitha zalo,

naphambi kwalabo abafuna ukuphila kwabo;

ngibehlisele inhlekelele,

nentukuthelo yami evuthayo,” kusho uSimakade.

“Ngiyothumela emva kwabo inkemba,

ngize ngibaqothule baphele nya.

₃₈Ngiyakubeka isihlalo sami sobukhosi e-Elamu,

ngibhubhise lapho inkosi nezikhulu,” kusho uSimakade.

₃₉“Kepha kuyakuthi ngezinsuku zokugcina

ngikuguqule ukuthunjwa kwe-Elamu,” kusho uSimakade.