UJeremiya 51

“IBhabhele nabakhileyo eLebhi Khamayi,

ngiyakubavusela umoya wombhubhisi.

₂Ngiyothumela abafokazi eBhabhele,

abayolihlunga,

balithulule,

balenze incithakalo izwe lalo;

ngokuba ngosuku lwenhlekelele

bayolithelekela nxazonke.

₃Ningamniki thuba lokuciba

ngomnsalo wakhe owaseBhabhele,

makangahlomi ngezikhali zakhe.

Izinsizwa zalo ningazisindisi,

niwaqede nya amabutho alo.

₄Bayakuwa begwaziwe ezweni lamaKhaledi,

bemanxebanxeba emigwaqweni yalo.

₅Ngokuba u-Israyeli noJuda

akabahlamukanga uNkulunkulu wabo,

nakuba izwe labo lonakele koNgcwele ka-Israyeli.

₆“Balekani eBhabhele,

kube yilowo nalowo asindise impilo yakhe,

ningabhujiswa ngenxa yokona kwalo,

ngokuba yisikhathi sempindiselo kaSimakade,

uyakuphindisela kulo.

₇IBhabhele beliyindebe yegolide,

esandleni sikaSimakade,

eyadakisa umhlaba wonke;

izizwe zaliphuza iwayini lalo,

ngalokho izizwe seziyahlanya.

₈IBhabhele seliwe ngokuphazima kweso,

libhidliziwe.

Likhihleleni isililo,

ubuhlungu balo nibutholele ibhalisamu,

hleze lingelapheka.

₉“Ngabe silelaphile iBhabhele,

kodwa alelapheki,

lishiyeni, masihambe,

kube yilowo nalowo aye ezweni lakubo,

ngokuba ukwehlulelwa kwalo

kufinyelela ezulwini,

kuphakanyiselwe nasemafini.

₁₀“USimakade ukubonakalisile ukunqoba kwethu;

wozani siyobika eZiyoni,

ngomsebenzi awenzile

uSimakade uNkulunkulu wethu.

₁₁“Lolani imicibisholo, nithathe izihlangu.

USimakade uvivise amakhosi aseMediya,

ngokuba inhloso yakhe ngeBhabhele

ngukuba alibhubhise;

lokhu kuyimpindiselo kaSimakade,

impindiselo ngethempeli lakhe.

₁₂Phakamisani ibhanela ngasogangeni eBhabhele,

nengeze abaqaphi,

nimise abalindi,

nibeke abazolala unyendle,

ngokuba uSimakade ukuhlosile,

futhi uyakukwenza lokho

akhuluma ngakho kwabakhileyo eBhabhele.

₁₃Wena ohlala ngasemanzini amaningi,

nonengcebo eningi;

isiphetho sakho sesifikile,

isikhathi sokunqanyulwa kwempilo yakho njengomucu.

₁₄USimakade Wamabandla

uzifunga Yena uqobo, uthi:

impela ngiyakukuthelekela

ngezinkumbi zamabutho njengesikhonyane,

ayokhuza iziqubulo zokunqoba ngawe.

₁₅“Umhlaba wawenza ngamandla akhe,

izwe walimisa ngokuhlakanipha kwakhe,

ngokuqonda kwakhe weneka izulu.

Izulu walendlala ngokuqonda kwakhe.

₁₆Lapho eduma ngezwi lakhe,

kuhlokoma amanzi ezulwini;

ukhuphula inkungu emikhawulweni yomhlaba,

athumele umbani nemvula,

akhiphe umoya ezinqolobaneni zakhe.

₁₇“Bonke abantu bayiziphukuphuku,

abanalwazi;

bonke ababumbi bathelwe ngehlazo,

nezithombe zabo ezibunjiweyo ziyinkohliso;

azinamphefumulo.

₁₈Ziyize, umsebenzi wokuhlekwa,

ngesikhathi abayojeziswa ngaso ziyakushabalala.

₁₉Isabelo sikaJakobe asifani nalaba,

ngokuba nguye okubumbileyo konke;

u-Israyeli uyisizwe nefa lakhe;

nguSimakade Wamabandla igama lakhe.

₂₀“Uyizembe lami nezikhali zokulwa;

ngawe ngiphahlaza izizwe,

ngawe ngibhubhisa imibuso,

₂₁ngawe ngiphahlaze ihhashi nomgibeli walo,

ngawe ngiphahlaze inqola nogibele kuyo,

₂₂ngawe ngiphahlaze abesilisa nabesifazane,

ngawe ngiphahlaze abadala nabancane,

ngawe ngiphahlaze izinsizwa nezintombi.

₂₃Ngawe ngiphahlaze umelusi nomhlambi wakhe,

ngawe ngiphahlaze umlimi nezinkabi zakhe,

ngawe ngiphahlaze ababusi nezikhulu.

₂₅“Bheka, ngimelene nawe ntaba ebhubhisayo,” kusho uSimakade,

“wena obhubhisa umhlaba wonke;

ngiyakwelula isandla sami

ngikushaye,

ngikugingqagingqe emadwaleni,

ngikuphendule intaba eshisiweyo.

₂₆Abayukuthatha kuwe itshe legumbi

netshe lesisekelo,

ngokuba uyakuba yincithakalo, kuze kube phakade,” kusho uSimakade.

₂₇“Phakamisani ibhanela ezweni,

nishaye icilongo ezizweni,

nivivise izizwe ukuba zilwe nalo,

nibize imibuso yase-Ararathi,

yaseMini nase-Ashikhenaze, ilihlasele.

Nibeke induna yamabutho amelane nalo,

nithumele khona amahhashi anjengequlu lesikhonyane.

₂₈Vivisani izizwe,

amakhosi aseMediya,

nezinduna zalo, nababusi balo,

nezwe lonke abalibusayo.

₂₉Umhlaba uyathuthumela, uqhaqhazele;

ngokuba inhloso kaSimakade ngeBhabhele izofezeka,

enze iBhabhele libe yincithakalo,

ukuze kungabi bikho ohlala kulo.

₃₀Amaqhawe aseBhabhele aseyekile ukulwa,

asehlala ezinqabeni zawo;

aphelelwe ngamandla,

anjengamanina;

izindlu zalo zishisiwe,

imigoqo yalo inqanyuliwe.

₃₁Isigijimi siyagijma, sihlangane nesinye,

nesithunywa silandela esinye

ukuyobikela inkosi yaseBhabhele,

ukuthi umuzi wayo usudliwe nxazonke.

₃₂Amazibuko avinjiwe,

umhlanga washiswa ngomlilo,

amabutho ayathuthumela.”

“Indodakazi yaseBhabhele injengesibuya,

ngesikhathi sinyathelwa.

Kuseyisikhashana nje,

sizofika nakuyo isikhathi sokuvunwa kwayo.”

₃₄UNebukhadinezari, inkosi yaseBhabhele

ungidlile wangiqeda;

ungenze isitsha esingenalutho,

wangigwinya njengodrago;

ugcwalisile isisu sakhe ngokumnandi kwami,

wangiphalaza.

₃₅“Ubudlova obenziwe kimi nakubantu bakithi,

mabube phezu kweBhabhele;”

makasho kanjalo owakhileyo eZiyoni.

“Igazi lami malibe phezu kwabakhileyo eKhalideya;”

malisho kanjalo iJerusalema.

“Bheka, ngiyakuyimela indaba yakho,

ngikuphindiselele,

ngilomise ulwandle lwalo,

ngenze umthombo walo ushe.

₃₇IBhabhele liyakuba yizindunduma zamatshe,

indawo ehlala amakhanka;

incithakalo nento enximfelwayo,

kungabi bikho ohlala khona.

₃₈Khona abantu babhonga kanyekanye njengezingonyama,

babhodle njengamabhongo ezingonyama.

₃₉Kuyothi lapho sebefa yindlala,

ngibenzele idili,

ngibadakise ukuze baquleke,

balale ubuthongo baphakade, bangavuki,” kusho uSimakade.

₄₀“Ngiyakubehlisa bayohlatshwa njengamawundlu,

nanjengezinqama nezimpongo.

₄₁“Maye, ngokuthunjwa kweSheshakhi,

nokubanjwa kwezwe elalinodumo emhlabeni wonke!

Maye, iBhabhele seliyinto esabekayo ezizweni!

₄₂Ulwandle lwenyukele eBhabhele,

lwalisibekela ngamaza alo ahlokomayo.

₄₃Imizi yakhona ibhujisiwe;

sekuyizwe elomileyo, nehlane;

izwe elingasahlalwa muntu,

ngisho nendodana yomuntu ingedlule kulo.

₄₄Ngiyakujezisa uBheli eBhabhele,

ngikukhiphe emlonyeni wakhe lokhu akugwinyileyo;

izizwe azisayukugobhozela kuye,

ugange lwaseBhabhele luyakuwa.

₄₅“Phumani kulo, bantu bami,

kube yilowo nalowo asindise impilo yakhe

olakeni lukaSimakade oluvuthayo.

₄₆Izinhliziyo zenu mazingadangali,

ningayesabi imibiko eniyizwa ezweni;

lapho ngalo nyaka kufika umbiko othile,

kuthi ngolandelayo kufike omunye umbiko;

kube nobudlova ezweni,

umbusi avukele umbusi.

₄₇Ngakho bheka,

ziyeza izinsuku,

lapho ngiyozijezisa

izithombe ezibaziweyo zaseBhabhele,

izwe lakhona lijabhe,

bonke ababuleweyo badindilize kulo.

₄₈Izulu nomhlaba,

nakho konke okukulo, kuqhumuke,

kuhlabelele ngeBhabhele,

ngokuba ababhubhisi bayakulithelekela

bevela enyakatho,” kusho uSimakade.

₄₉“IBhabhele kufanele ukuba nalo liwe,

ngenxa yababuleweyo bakwa-Israyeli,

njengoba ababulawa emhlabeni wonke,

babulawa ngenxa yeBhabhele.

₅₀Nina eniphunyuke enkembeni,

hambani, ningami;

khumbulani uSimakade nikwelikude izwe,

nicabange ngeJerusalema.

₅₁“Sijabhile, ngokuba sithukiwe;

ubuso bethu buthelwe ngehlazo,

ngokuba abafokazi bangene

ezindaweni ezingcwele zendlu kaSimakade.”

₅₂“Ngakho bheka,

ziyeza izinsuku,

lapho ngiyozijezisa izithombe zalo ezibaziweyo,

kulo lonke izwe lakhona

kuqume abalimeleyo,” kusho uSimakade.

₅₃“Ngisho noma iBhabhele lingafinyelela esibhakabhakeni,

liyiqinise inqaba yalo ephakemeyo,

nokho ngiyakuthumela ababhubhisi,

balithelekele,” kusho uSimakade.

₅₄“Yizwani umsindo wokukhala kalusizi

uvela eBhabhele,

nowencithakalo enkulu

ophuma ezweni lamaKhaledi.

₅₅Ngokuba uSimakade uyalibhubhisa iBhabhele,

awuqede umsindo omkhulu kulo.

Amaza alo ahlokoma njengamanzi amaningi,

kuzwakala nomsindo wokuhlokoma kwawo.

₅₆Ngokuba umbhubhisi uselithelekele,

uhlasele iBhabhele,

kuthunjwa amabutho alo,

neminsalo yawo iyaphoqozwa,

ngokuba uSimakade unguNkulunkulu wemivuzo,

uphindisela ngokupheleleyo.

₅₇Ngiyakudakisa izikhulu zalo;

izihlakaniphi zakhona,

izinduna zalo,

ababusi balo,

namabutho alo;

bayakulala ubuthongo baphakade, bangavuki,”

kusho iNkosi egama layo nguSimakade Wamabandla.

“Ugange olubanzi lwaseBhabhele

luyakubhidlizwa nokubhidlizwa,

amasango alo aphakemeyo ayakushiswa ngomlilo.

Abantu bakhandlekela ize,

nomshikashika wezizwe uzophelela emlilweni.”