UJobe 15

₂“Ohlakaniphileyo uyakuphendula yini

ngolwazi olungathi shu,

agcwalise isisu ngomoya

wasempumalanga na?

₃Aphikisane ngamazwi angasizi lutho

nangezinkulumo ezingenalusizo na?

₄Kepha wena uyakuchitha ukwesaba,

uqede ukuzindla phambi kukaNkulunkulu.

₅Ngokuba iziphambeko zakho

zifundisa umlomo wakho;

ukhetha ukukhuluma kwamaqili.

₆Ngumlomo wakho okulahla ngecala,

yizindebe zakho uqobo, hhayi mina,

ezifakaza okumelene nawe.

₇Ngabe ungumuntu wokuqala yini owazalwa na?

Wabakhona zingakabi bikho nezintaba na?

₈Wakuzwa yini okwakhulunywa

emkhandlwini kaNkulunkulu,

wazigodlela wedwa ukuhlakanipha na?

₉Yini oyaziyo thina esingayaziyo na?

Yini oyiqondayo thina esingayiqondiyo na?

₁₀Izimpunga, nabamnkantshubomvu

abadala kunoyihlo bangakithi.

₁₁Incane yini kuwe induduzo kaNkulunkulu,

nezwi elikhulunywa kahle kuwe na?

₁₂Kungani inhliziyo yakho ikumukisa na?

Kungani amehlo akho egcwala intukuthelo,

₁₃bese ubhokela uNkulunkulu ngolaka,

ukhulume amazwi anje ngomlomo wakho na?

₁₄Uyini umuntu

ukuba angaba ngohlanzekileyo,

nozelwe ngowesifazane

ukuba abe ngolungileyo na?

₁₅Nabangcwele bakhe akabethembi,

nezulu alihlanzekile emehlweni akhe,

₁₆kakhulu kangakanani

onengekayo nowonakeleyo,

umuntu ophuza ububi njengamanzi na?

₁₇“Ngizokutshela, ngilalele,

ngizokulandisa engikubonileyo,

₁₈lokho okwakhulunywa yizihlakaniphi

ezingakufihlanga kokhokho bazo,

₁₉izwe elanikwa zona kuphela,

akukho mfokazi

owadabula phakathi kwabo.

₂₀Umuntu oyisikhohlakali

ubinyabinyeka ebuhlungwini imihla yonke,

ngayo yonke iminyaka

isidlova esibekelwe yona.

₂₁Ukunkeneneza okwesabisayo kusezindlebeni zakhe,

uyothi esahlezi enethezekile,

kutheleke umphangi.

₂₂Akethembi ukuthi uyobuya ebumnyameni,

ulindelwe yinkemba.

₂₃Uhamba ezulazula,

efuna ukudla,

athi: kuphi na?

Uyazi ukuthi usuku lobumnyama

selusesandleni sakhe.

₂₄Ukuhlupheka nosizi kuyamethusa,

kumkhungatha njengenkosi

ezilungiselele ukuya empini,

₂₅ngokuba waphonsela uNkulunkulu inselelo,

wazigabisa kuSomandla.

₂₆Wamelana naye ngeqholo,

ethembele emahawini akhe aqinileyo,

₂₇ngokuba wasibekela ubuso bakhe

ngamafutha akhe,

wenza umvingqi okhalo lwakhe.

₂₈Wahlala emizini eyincithakalo,

nasezindlini okungahlali muntu kuzo,

ezimiselwe ukuba ngamanxiwa.

₂₉Akayukuceba, nengcebo yakhe ayiyukuhlala,

nempahla yakhe ayiyukwanda ezweni.

₃₀Akayukusuka ebumnyameni,

ilangabi liyakubunisa amagatsha akhe,

apheshulwe ngukuphefumula komlomo wakhe.

₃₁Makangethembi okuyize,

azikhohlise ngokuyize,

ngokuba ize liyakuba ngumvuzo wakhe.

₃₂Kuyokwenzeka kungakabi yisikhathi,

igatsha lakhe lingakakhuli libe luhlaza.

₃₃Uyakuvuthulula amagilebhisi akhe

aluhlaza njengomvini,

awohloze imbali yakhe njengomnqumo.

₃₄Ngokuba umshungu wabangenabunkulunkulu

uyinyumba,

nomlilo uqothula amathende

athengwa ngokufunjathiswa.

₃₅Bakhulelwa inkathazo,

bazale inkohlakalo,

isisu sabo silungiselela inkohliso.”