UJobe 31

₁“Ngenza isivumelwano namehlo ami,

ngingayibuka kanjani

intombi ngokukhanuka na?

₂Kanti siyini isabelo

ebesiyakuvela kuNkulunkulu kweliphezulu,

nefa ebeliyakuphuma kuSomandla ekuphakameni na?

₃Inhlekelele ayehleli yini abangalungile,

nengozi izikhohlakali na?

₄Ngabe akaziboni yini izindlela zami,

azibale zonke izinyathelo zami na?

₅“Uma ngihambe ngokukhohlakala,

nonyawo lwami lusheshile ukuya enkohlakalweni,

₆mangilinganiswe esilinganisweni esilungileyo,

ukuze uNkulunkulu abuvume ubuqotho bami.

₇Uma izinyathelo zami zichezukile endleleni,

nenhliziyo yami yahuhwa ngamehlo ami,

uma kunamathele isisihla esandleni sami,

₈mangitshale, kudle omunye,

impela mazisishulwe izithelo zami.

₉“Uma inhliziyo yami iyengwe ngowesifazane,

ngacutha emnyango womakhelwane wami,

₁₀umkami makagayele omunye,

kuguqe abanye phezu kwakhe.

₁₁Ngokuba lokho kuyichilo,

necala elifanele ukujeziswa;

₁₂lokho kungumlilo

oqothula kuze kube sekubhujisweni,

uyosiphula yonke inzuzo yami.

₁₃“Uma ngingalumelanga udaba lwesigqila sami

sesilisa noma sesifazane

lapho sikhononda ngami,

₁₄ngiyokwenzenjani lapho uNkulunkulu esukuma na?

Lapho engiphenya,

ngiyophendula ngithini na?

₁₅Yena owangibumba esiswini,

akusiye yini owabenza nabo na?

Akamunye yini owasibumba esizalweni na?

₁₆“Uma ngigodlele ompofu lokho akufisayo,

ngenza amehlo omfelokazi

ukuba afiphale,

₁₇ngaludla ngedwa ucezu lwami lwesinkwa,

ngayincisha intandane,

₁₈ngokuba kusukela ebusheni bami

ngayikhusela intandane njengoyise,

kwasesiswini sikamame

ngingumholi wabafelokazi,

₁₉uma ngibona obhubhayo

ngenxa yokweswela isembatho,

noma ontulayo engenakho okokwembatha,

₂₀umzimba wakhe ungangithokozisi;

engafudunyezwanga ngoboya bezimvu zami,

₂₁uma ngiphakamisele intandane isandla

ngoba ngibona ukuthi

nginabalandeli esangweni,

₂₂uma kunjalo ihlombe lami

malihleshulwe esiphangeni,

nengalo yami yephulwe enkothweni yayo.

₂₃Ngokuba ngiyayesaba inhlekelele

eyehliswa nguNkulunkulu;

anginakwenza lutho ngenxa yobukhulu bakhe.

₂₄“Uma igolide ngilenze ithemba lami,

ngathi egolideni elicwengekile:

‘Ngethemba wena;’

₂₅uma ngathokoziswa ngukuba nengcebo enkulu

nangukuthi isandla sami siyizuzile;

₂₆uma ngibone ukukhanya

ukuthi kuyakhazimula,

nokuthi inyanga ihamba icwazimula,

₂₇inhliziyo yami yayengeka esithe,

ngaqabula isandla sami,

₂₈nalokho kuyisono esimele ukujeziswa,

ngokuba bengizobe ngimphikile

uNkulunkulu phezulu.

₂₉“Uma ngithokozile ngengozi eyehlele ongizondayo,

ngatshakadula ngenxa yokuba ehlelwe ngokubi,

₃₀kodwa angiwuvumelanga umlomo wami

ukuba wone

ngokucela impilo yakhe ngokuyiqalekisa.

₃₁Uma abendlu yami bethi:

‘Ngubani ongathola umuntu ongasuthanga ngenyama

etafuleni likaJobe na?’

₃₂Abafokazi abalalanga emgwaqweni,

ngayivula iminyango yami,

₃₃uma ngisibekele iziphambeko zami

njengo-Adamu,

ngokufihla ububi bami esifubeni sami,

₃₄ngokuba ngesaba isixuku esikhulu,

ngaba novalo lokwedelelwa ngabomndeni,

ngaze ngathula,

nokho angiphumanga emnyango.

₃₅Ngabe ukhona yini ongilaleleyo na?

Nantu uphawu lwami,

uSomandla makangiphendule.

Sengathi ngabe nginencwadi yecala

ayilobileyo omelana nami!

₃₆Impela, bengiyakuyithwala emahlombe ami,

ngiyibophele kimi njengomqhele wami,

₃₇ngimlandise ngomumo wezinyathelo zami,

ngisondele kuye njengenkosi.

₃₈“Uma umhlaba wami ukhonondile ngami,

nemisele ekuwo yakhala kanyekanye;

₃₉uma izithelo zawo

engizidlile ngingazikhokhelanga,

ngayimbangela yokufa kwabanikazi bazo;

₄₀makumile ameva esikhundleni sikakolo,

nokhula endaweni yebhali.”