UJobe 34

₂“Yizwani amazwi ami,

nina zihlakaniphi,

ningilalele nina enaziyo.

₃Ngokuba indlebe iyawahlunga amazwi,

njengalokhu ulwanga lunambitha ukudla.

₄Masizikhethele thina okulungile,

sikubone thina okuhle.

₅Ngokuba uJobe uthe:

‘Ngilungile, kodwa uNkulunkulu

ungephuce ilungelo lami.

₆Noma ngiqinisile

kepha ngithathwa njengonamanga,

inxeba lami alipholi,

nakuba ngingenzanga siphambeko.’

₇Ngumuphi umuntu onjengoJobe,

ophuza ukungcofwa njengamanzi,

₈ohamba engumshungu nezikhohlakali,

ahambe nababi na?

₉Ngokuba uthi:

‘Akunalusizo kumuntu

ukuba azane noNkulunkulu.’

₁₀“Ngalokho ngizweni,

nina bantu abanokuqonda,

makube kude noNkulunkulu ukuba enze inkohlakalo,

nakuSomandla ukuba enze okungalungile.

₁₁Ngokuba uyabuyisela kumuntu njengokwenza kwakhe,

enze bazuze yilowo nalowo

ngokwezindlela zakhe.

₁₂Impela uNkulunkulu akakwenzi okubi,

uSomandla akabuhlanekezeli ubulungiswa.

₁₃Ngubani owambeka phezu komhlaba na?

Ngubani owamisa izwe lonke na?

₁₄Uma ebeyakuzibheka Yena,

azibuyisele umoya wakhe

nomphefumulo wakhe,

₁₅bonke abantu bayakufa kanyekanye,

umuntu abuyele othulini.

₁₆“Uma unengqondo, yizwa lokhu,

ulalele amazwi engiwakhulumayo.

₁₇Imbala ozonda ubulungiswa uyakubusa yini na?

Uyakumlahla yini olungileyo nonamandla,

₁₈othi enkosini:

‘Awuyinto yalutho,’ nasezikhulwini athi:

‘Niyizikhohlakali,’

₁₉ongakhethi buso bezikhulu,

onganaki ocebileyo kunompofu na?

Ngokuba bonke bangumsebenzi wezandla zakhe.

₂₀Bayafa ngokuphazima kweso,

phakathi kwamabili abantu bayathuthumela,

banyamalale,

amaqhawe ayasuswa,

kepha hhayi ngesandla somuntu.

₂₁“Ngokuba amehlo akhe asezindleleni zabo bonke,

uzibona zonke izinyathelo zabo.

₂₂Abukho ubumnyama,

nesigayegaye asikho,

lapho abenza inkohlakalo bengacasha khona.

₂₃Ngokuba uNkulunkulu akadingi

ukuba amphenyisise umuntu

ukuze eze phambi kwakhe ekwehlulelweni.

₂₄Uyabaphahlaza abanamandla, engaphenyanga,

abeke abanye ezikhundleni zabo.

₂₅Ngalokho uyayazi imisebenzi yabo,

uyabaqumba phansi ebusuku, baphahlazwe.

₂₆Uyabashaya njengezikhohlakali kubona bonke abantu,

₂₇ngokuba bachezuka ekumlandeleni,

abaze banaka neyodwa yezindlela zakhe.

₂₈Benza ukuba ukukhala kwabampofu kufinyelele kuye,

wakuzwa ukukhala kwabahluphekayo.

₂₉Uma Yena ethula,

ngubani ongamsola na?

Uma efihla ubuso bakhe,

ngubani ongambona na?

Ubusa isizwe nomuntu ngokufanayo,

₃₀ukuze kungabusi muntu ongenankulunkulu,

angabi wugibe kubantu.

₃₁“Ukhona yini oke wathi kuNkulunkulu:

‘Ngethweswe icala noma ngingonanga.

₃₂Lokhu engingakuboni, ngifundise khona;

uma ngenzile okungalungile, angisayukuphinda.’

₃₃Uyakuphindisela ngokuthanda kwakho yini,

njengoba usenqaba isifundiso sami na?

Ngokuba nguwe ozakukhetha, hhayi mina;

khuluma okwaziyo.

₃₄“Abantu abanokuqonda bayothi kimi,

yebo, nezihlakaniphi ezingizwayo, ziyothi:

₃₅‘UJobe ukhuluma engenalwazi,

amazwi akhe awanangqondo.’

₃₆Sengathi uJobe angavivinywa njalo,

ngokuba uphendula njengezikhohlakali.

₃₇Uyenezelela ukuhlubuka esonweni sakhe,

ushaya izandla phakathi kwethu,

akhulume amazwi amaningi kuNkulunkulu.”