IZaga 22

₁Igama elihle likhethekile

kunengcebo enkulu, nomusa,

kunesiliva negolide.

₂Abacebile nabampofu bayefana;

bonke benziwe nguSimakade.

₃Ohlakaniphileyo uyayibona ingozi, acashe,

kodwa abangenalwazi bayaphikelela, bajeziswe.

₄Umvuzo wokuthobeka nokwesaba uSimakade

wudumo, nengcebo nokuphila.

₅Ameva nezingibe kusendleleni yabaphambukileyo,

kodwa ogcina umphefumulo wakhe

uhambela kude nakho.

₆Khulisa umntwana ngendlela eyakuba ngeyakhe;

kuyakuthi lapho esekhulile angasuki kuyo.

₇Isicebi sibusa phezu kwabampofu,

nobolekayo uyisigqila somtshelekileyo.

₈Ohlwanyela ububi uyakuvuna usizi,

nenduku yolaka lwakhe iyakuphela.

₉Ophanayo uyobusiswa,

ngoba wabelana ukudla nabampofu.

₁₀Xosha isedeleli,

kuzophela ingxabano,

ukuphikisana nehlazo.

₁₁Othanda inhliziyo ehlanzekileyo

nonenkulumo enomusa,

ungumngani wenkosi.

₁₂Amehlo kaSimakade alonda ulwazi,

kepha uyawabhubhisa amazwi eqili.

₁₃Ivila, lithi:

“Kunebhubesi ngaphandle;

ngaphuma nje ngizobulawa emgwaqweni.”

₁₄Umlomo wowesifazane ondindayo

ungumgodi ojulileyo;

oqalekiswe nguSimakade, uyakuwela kuwo.

₁₅Ubuwula buboshelwe enhliziyweni yomntwana,

kodwa induku yokumyala

ibuqhelisela kude naye.

₁₆Ocindezela ompofu ukuze azicebise yena,

nopha ocebileyo, kuholela ebuphofini.

₁₇Beka indlebe yakho,

uzwe amazwi ezihlakaniphi,

usigcine enhliziyweni yakho isifundiso sami,

₁₈ngokuba kuyokuba mnandi

ukuba ukulonde enhliziyweni yakho,

lapho konke sekulungele izindebe zakho.

₁₉Ukuba ithemba lakho libe kuSimakade,

ngikwazisile khona namuhla,

yebo, wena.

₂₀Angikulobelanga yini izeluleko nokwazi

ezinsukwini ezintathu,

₂₁ukuba kukufundise iqiniso,

namazwi athembekile,

ukuze uthumele impendulo

eyiqiniso kwabakuthumileyo na?

₂₂Ungamqoli ompofu

ngoba ubona ubuphofu bakhe;

ungamcindezeli ohluphekile esangweni,

₂₃ngokuba uSimakade

uyayimela indaba yabo,

kuthi ababephucayo Yena

abephuce ukuphila kwabo.

₂₄Ungabi ngumngani womuntu onolaka,

ungahambi nomuntu othukutheleyo,

₂₅funa ufunde izindlela zakhe,

umphefumulo wakho uwele ogibeni.

₂₆Ungazibandakanyi nabenza izibambiso,

noma ube yisibambiso sesikweletu;

₂₇uma kungekho ongakhokha ngakho,

uyakuthathelwani umbhede wakho

phansi kwakho na?

₂₈Ungasisusi isikhonkwane esidala

esashayelwa ngokhokho bakho.

₂₉Uyambona umuntu onekhono,

uyosebenzela amakhosi,

hhayi abantukazana.