AMahubo 104

₁Mbonge uSimakade, mphefumulo wami,

Simakade Nkulunkulu wami, umkhulu,

wembethe udumo nobukhosi,

₂wembethe ukukhanya njengengubo,

weneka izulu njengendwangu.

₃Ubeka imishayo yezindlu zakhe emanzini,

wenza amafu abe yinqola yakhe,

uhamba ngamaphiko omoya,

₄wenza umoya ube yizithunywa zakhe,

izikhonzi zakhe zibe yilangabi lomlilo.

₅Umhlaba uwumise phezu kwezisekelo zawo,

ukuze unganyakaziswa

kuze kube phakade naphakade.

₆Wawumboza ngolwandle njengengubo,

amanzi ema phezu kwezintaba.

₇Ngokukhuza kwakho abaleka,

ngezwi lokuduma kwakho ashesha asuka.

₈Enyuka izintaba, ehla izigodi,

aze afika endaweni owawuyimisele wona.

₉Uwamisele umngcele ukuba angaweqi,

angabuyi ukuzosibekela umhlaba.

₁₀Uthumela imithombo ezigodini,

yona igijima phakathi kwezintaba.

₁₁Iphuzisa izilwane zonke zasendle,

izimbongolo zasendle zicime ukoma kwazo.

₁₂Izinyoni zezulu zakhe ngakuyo,

zizwakalisa izwi lazo phakathi kwamagatsha.

₁₃Uchelela izintaba ngokuvela emakamelweni

akhe aphezulu,

umhlaba uyaneliswa yisithelo semisebenzi yakho.

₁₄Uhlumisela izinkomo utshani

nemifino yokusiza umuntu,

ukuze athole ukudla okuvela emhlabeni,

₁₅newayini elijabulisa inhliziyo yomuntu,

namafutha okukhazimulisa ubuso,

nesinkwa esiqinisa inhliziyo yomuntu.

₁₆Imithi kaSimakade iyasuthisa,

imisedari eLebhanoni ayitshalileyo,

₁₇kwakhela kuyo izinyoni,

unogolantethe unesidleke kuyo imisayiphuresi.

₁₈Izintaba eziphakemeyo ngezezimbuzi zasendle,

amawa ayisiphephelo sezimbila.

₁₉Wenza inyanga ukuba ibe

ngeyokwehlukanisa izinkathi,

ilanga liyazi ukuthi lishona nini.

₂₀Ubumnyama wenza ukuba bube wubusuku,

phakathi kwabo izilo zonke

zasehlathini ziyaphuma.

₂₁Amabhongo amabhubesi agwavumele inyamazane,

efuna ukudla kwawo kuNkulunkulu.

₂₂Kuthi ngokuphuma kwelanga

abuyele phansi emiphandwini yawo, alale.

₂₃Kube sekuphuma umuntu,

aye emsebenzini wakhe

nasemshikashikeni wakhe,

kuze kuhlwe.

₂₄Simakade, yaze yaba miningi

imisebenzi yakho,

yonke uyenze ngokuhlakanipha;

umhlaba ugcwele izidalwa zakho.

₂₅Bheka nje ulwandle, lukhulu, lubanzi,

kulo kukhona izilwanyana

ezinwabuzelayo ezingenakubalwa,

izilwane ezincane nezinkulu.

₂₆Kulo kuntweza imikhumbi,

inkanyamba yasolwandle oyidalileyo idlala kulo.

₂₇Zonke lezi zidalwa zibheke Wena,

ukuze uzinike ukudla kwazo

ngesikhathi esifaneleyo.

₂₈Uyazinika ukudla, zikubuthe;

uvula isandla sakho, zisuthe ngokuhle.

₂₉Uyasitheza ubuso bakho, zethuke,

uyasusa umphefumulo wazo, zife,

zibuyele othulini lwazo.

₃₀Uyathumela umoya wakho, zidalwe;

wenza bube busha ubuso bomhlaba.

₃₁Inkamulo kaSimakade mayime

kuze kube phakade;

uSimakade makathokoze ngemisebenzi yakhe,

₃₂Yena obheka umhlaba, maqede uthuthumele,

athinte izintaba, zithunqe.

₃₃Ngizomhubela uSimakade,

inqobo nje uma ngisaphila.

Ngizohlabelelela uNkulunkulu wami ngisekhona.

₃₄Kwangathi izizindlo zami zingamthokozisa,

ngokuba ukuthokoza kwami kukuSimakade.

₃₅Izoni maziphele emhlabeni,

kungabe kusaba bikho zikhohlakali.

Mbonge uSimakade, mphefumulo wami,

Haleluya!