AMahubo 132

₁Khumbula Simakade, ngenxa kaDavide,

zonke izinhlupheko zakhe.

₂Wafunga kuSimakade,

wenza isithembiso kuye

onguMninimandla kaJokobe, wathi:

₃“Angiyukungena ethendeni lendlu yami,

angiyukugibela embhedeni wami,

₄angiyukuwanika amehlo ami ubuthongo,

nezinkophe zami, ukozela;

₅ngingakamtholeli uSimakade indawo,

indlu yonguMninimandla kaJakobe.”

₆Sizwile ngakho sise-Efratha,

sakuthola emasimini eJari.

₇“Masingene endlini yakhe,

sikhuleke ngasesenabelweni sezinyawo zakhe.

₈Sukuma, Simakade,

uye endaweni yakho yokuphumula,

Wena nomphongolo wamandla akho.

₉Abaphristi bakho mabembeswe ukulunga,

abethembekileyo bakho bathokoze.”

₁₀Ngenxa yenceku yakho uDavide

mawungabufulathelisi ubuso bakho

kogcotshiweyo wakho.

₁₁USimakade wafunga kuDavide,

iqiniso angayukuguquka kulo, wathi:

“Ovela okhalo lwakho

ngiyombeka esihlalweni sakho sobukhosi.

₁₂Uma abantwana bakho

besigcina isivumelwano sami nobufakazi bami

engiyobafundisa bona,

impela abantwana babo

bayohlala esihlalweni sakho

kuze kube phakade.”

₁₃USimakade uqoke iZiyoni,

ulithandile ukuba libe

yindawo yakhe yokuhlala, wathi:

₁₄“Nansi indawo yami yokuphumula

kuze kube phakade,

ngizohlala kuyo,

ngokuba yiMina engiyithandile.

₁₅Ngiyakubusisa kakhulu ukudla kwalo,

abantulayo ngiyakubasuthisa ngesinkwa.

₁₆Abaphristi ngiyobembesa insindiso,

abethembekileyo bayohlokoma ngenjabulo.

₁₇“Ngiyakuhlumisa uphondo lukaDavide,

ogcotshiweyo wami ngimlungisele isibani.

₁₈Izitha zalo ngiyozithela ngehlazo,

kepha kuye, umqhele wakhe uyokhazimula.”