AMahubo 139

₁Wena Simakade ungihlolisisile, uyangazi.

₂Uyakwazi ukuhlala kwami nokuma kwami,

uqonda umcabango wami ukude.

₃Uhlola ukuhamba kwami nokulala kwami,

uzazi zonke izindlela zami.

₄Ngaphambi kokuba ngiphimise izwi

ngomlomo wami,

Wena Simakade usuke usukwazi konke.

₅Ungizungeze ngemuva nangaphambili,

wabeka isandla sakho phezu kwami.

₆Ukwazi okunjalo kuyangimangalisa,

kuphakeme, anginakufinyelela kukho.

₇Ngiyakuya kuphi,

ngisuke eMoyeni wakho na?

Ngiyakubalekelaphi,

ngisuke phambi kwakho na?

₈Uma ngikhuphukela ezulwini,

Wena ulapho;

uma ngendlala icansi lami

endaweni yabafileyo,

nangu Wena.

₉Uma ngithatha amaphiko okusa,

ngiye ngihlale emikhawulweni yolwandle,

₁₀nalapho isandla sakho siyakungihola,

esokunene sakho singibambe.

₁₁Uma bengithi:

“Ubumnyama mabungehlele,

ukukhanya kube ngubusuku kimi,”

₁₂ubumnyama bebungayukuba ngubumnyama kuwe,

ngokuba ubusuku bebuyakukhanya njengemini,

ubumnyama bufane nokukhanya.

₁₃NguWena owenza izinso zami,

wangiphica ngisesesibelethweni sikamame.

₁₄Ngiyakukubonga ngokuba ngenziwa

ngokwesabekayo nangokumangalisayo;

imisebenzi yakho iyamangalisa,

umphefumulo wami ukwazi kahle.

₁₅Amathambo ami ayengafihlekile kuwe

lapho ngenziwa ekusithekeni,

ngibunjwa ezindaweni ezijulileyo zomhlaba.

₁₆Amehlo akho angibona ngiseyihlule,

zonke izinsuku zami zalotshwa encwadini yakho,

zanqunywa, lungakafiki nolulodwa kuzo.

₁₇Imicabango yakho, Nkulunkulu, ingamagugu kimi;

bukhulu kangaka ubuningi bayo.

₁₈Uma bengiyakuyibala,

miningi kunesihlabathi;

lapho ngivuka, bengiyakuba nawe.

₁₉Sengathi ungazibulala izikhohlakali, Nkulunkulu,

ngalokho-ke sukani kimi,

nina bachithi begazi.

₂₀Izitha zakho zikhuluma kabi ngawe,

zihlambalaza igama lakho.

₂₁Simakade, kanti angibazondi yini abakuzondayo na?

Anginengwa yini ngabakuvukelayo na?

₂₂Ngiyabazonda ngenzondo epheleleyo,

bayizitha kimi.

₂₃Ngihlole, Nkulunkulu,

uyazi inhliziyo yami;

ngilinge, uyazi imicabango yami,

₂₄ubone ukuthi kukhona yini okubi

ngaphakathi kwami,

ungiholele endleleni yaphakade.