AMahubo 2

₁Kungani abezizwe benza ugobe,

nabantu beceba okuyize na?

₂Amakhosi omhlaba ayazihlanganisa,

nababusi baceba icebo ngogcotshiweyo kaSimakade, bathi:

₃“Asigqabule izibopho zabo,

silahle izintambo abasibophe ngazo,

zisuke kithi.”

₄Yena ohlezi ezulwini uyahleka,

iNkosi iyababhuqa.

₅Iyakukhuluma nabo ngentukuthelo yayo,

ibafake ingebhe ngolaka lwayo, ithi:

₆“Mina ngiyibekile inkosi yami,

entabeni yami engcwele iZiyoni.”

₇Ngizakulanda ngesinqumo sikaSimakade,

owathi kimi:

“Wena uyindodana yami;

namuhla ngikuzele.

₈Cela kimi, ngikunike abezizwe

babe yifa lakho,

nemikhawulo yomhlaba ibe ngeyakho.

₉Uyakubaphula ngentonga yensimbi,

ubaphihlize njengokhamba lombumbi.”

₁₀Ngakho-ke hlakaniphani nina makhosi;

niyaleke nina babusi bomhlaba.

₁₁Khonzani uSimakade ngokwesaba,

nithokoze ngokuthuthumela.

₁₂Yangeni indodana, funa ithukuthele,

bese nibhubha endleleni,

ngokuba ulaka lwayo luvutha masinyane.

Kepha babusisiwe bonke

abaphephela kuyo.