AMahubo 28

₁Ngikhala kuwe, Simakade; Dwala lami,

ungazenzi isithulu kimi,

funa uma uthalalisa,

ngifane nalabo abehlela egodini.

₂Yizwa izwi lokunxusa kwami,

njengoba ngikhala kuwe,

ngiphakamisela izandla zami

endaweni yakho engcwelengcwele.

₃Ungangilahli kanye nezoni nabenzi bokubi,

abathi becebela omakhelwane babo

ububi ngezinhliziyo,

babe bekhuluma kahle ngemilomo yabo.

₄Banike umvuzo ofanele izenzo zabo,

nobubi bemisebenzi yabo,

nangokwenza kwezandla zabo,

uphindisele kubo abakwenzayo.

₅Ngokuba abayinaki imisebenzi kaSimakade,

nokwenziwe yizandla zakhe.

Uyobadiliza, angabe esabakha kabusha.

₆Makabongwe uSimakade,

ngokuba ulizwile izwi lokunxusa kwami.

₇USimakade ungamandla ami, nesihlangu sami,

inhliziyo yami yethembele kuye,

yingakho ngisizakele,

inhliziyo yami iyethaba.

Ngizomdumisa ngehubo lami.

₈USimakade ungamandla abantu bakhe.

Uyinqaba eyinsindiso yogcotshiweyo wakhe.

₉Sindisa abantu bakho,

ubusise ifa lakho, ubeluse,

ubathwale, kuze kube phakade.