AMahubo 32

₁Ubusisiwe umuntu osiphambeko sakhe sithethelelwe,

osono sakhe sesuliwe.

₂Ubusisiwe umuntu uSimakade angambaleli isiphambeko,

okungekho nkohliso emoyeni wakhe.

₃Ngenkathi ngithule,

amathambo ami awohloka

ngenxa yokububula usuku lonke.

₄Isandla sakho sangicindezela kanzima

ubusuku nemini,

ngaphelelwa ngamandla,

kwangathi ngihlaselwe wumoya weshisandlu. Sela

₅Ngase ngisivuma isono sami kuwe,

angaze ngasifihla isiphambeko sami.

Ngathi:

“Ngizozivuma iziphambeko zami kuSimakade,”

Yena wangithethelela icala lokona kwami.

₆Makuthi bonke abethembekileyo bakhuleke kuwe

ngesikhathi senhlupheko;

impela isikhukhula esinamandla asiyukufinyelela kubo.

₇Wena uyindawo yami yokubhaca,

uyangivikela enkathazweni,

ungiphahla ngenjabulo yokukhululwa. Sela

₈Ngizokubonisa, futhi ngikufundise

indlela ozohamba ngayo;

ngizobeka iso lami kuwe, ngikweluleke.

₉Ungafani nehhashi nomnyuzi okungenakuqonda,

okukhalinywa ngetomu nomkhala

ukuze kuhambe kuqonde,

kungenjalo akuyukuwulalela umthetho wakho.

₁₀Ziningi izinhlupheko zababi,

kodwa umusa uyamhaqa owethemba uSimakade.

₁₁Yethabani kuSimakade nina abalungileyo;

nihlokome ngentokozo

nina nonke enimsulwa enhliziyweni.