AMahubo 33

₁Yethabani kuSimakade nina abalungileyo.

Ukudumisa kubafanele abaqotho.

₂Mbongeni uSimakade ngomqangala,

nimculele ngehabhu elinezintambo ezilishumi.

₃Mhlabeleleni ihubo elisha,

ngenhlokomo nangobuciko,

nimdlalele imiqangala.

₄Izwi likaSimakade lilungile,

zonke izenzo zakhe zikholekile.

₅Uthanda ukulunga nobulungiswa,

umhlaba ugcwele umusa kaSimakade.

₆Ngezwi nangomoya womlomo kaSimakade,

kwadalwa amazulu namabandla wonke.

₇Uqoqela ndawonye amanzi olwandle

kube sengathi asembizeni,

utwa uluqoqela ezinqolobaneni.

₈Umhlaba wonke mawumesabe uSimakade;

bonke abakhileyo ezweni,

mabathuthumele phambi kwakhe.

₉Ngokuba wakhuluma, kwaba khona,

wayaleza, kwama, kwagxila.

₁₀USimakade ushafisa icebo labezizwe,

afojise amacebo ezizwe.

₁₁Icebo likaSimakade limi ingunaphakade,

namasu asenhliziyweni yakhe,

ezizukulwaneni ngezizukulwane.

₁₂Sibusisiwe isizwe esiNkulunkulu

waso unguSimakade,

isizwe azikhethele sona

saba yifa lakhe.

₁₃USimakade esezulwini ubuka phansi emhlabeni,

ababone bonke abantu.

₁₄Esesihlalweni sakhe sobukhosi, ubabuka bonke

abakhileyo emhlabeni,

₁₅nguYena owadala izinhliziyo zabo bonke;

oqaphela zonke izenzo zabo.

₁₆Inkosi ayisindiswa wubuningi bempi yayo;

iqhawe alikhululwa ngamandla alo amakhulu.

₁₇Ihhashi lempi liyize ekunqobeni,

alisindisi ngamandla alo amakhulu.

₁₈Impela iso likaSimakade

liphezu kwalabo abamesabayo,

kulabo abethembela emseni wakhe,

₁₉ukukhulula umphefumulo wabo ekufeni,

nokubagcina bephilile endlaleni.

₂₀Umphefumulo wethu ulindele uSimakade;

uwusizo lwethu nesihlangu sethu.

₂₁Inhliziyo yethu ithokozile ngaye,

ngoba sethemba igama

lakhe elingcwele.

₂₂Simakade, umusa wakho mawehlele phezu kwethu,

njengalokhu sithemba Wena.