AMahubo 41

₁Ubusisiwe onakekela ohluphekayo,

uSimakade uyomsindisa ngosuku lwenhlupheko.

₂USimakade uyomlondoloza, amgcine ephila;

uyobusiswa ezweni.

Akayukumnikela ezifisweni zezitha zakhe.

₃USimakade uyakumsimamisa okhukhweni lokufa,

amphilise kuzona zonke izifo zakhe.

₄Mina ngithi:

“Simakade, yiba nomusa kimi,

uphulukise umphefumulo wami,

ngokuba ngonile kuwe.”

₅Izitha zami zihambe

zikhuluma okubi ngami, zithi:

“Uzofa nini, igama lakhe

lingabe lisaphathwa na?”

₆Uma kukhona ozongibona,

ukhuluma amanga ngami.

Unqwabela okubi enhliziyweni yakhe,

aphume akhulume ngakho.

₇Bonke abangizondayo bahlangana ngami,

bahlebelane ngami,

bengisongela, bethi:

₈“Sengathi angavelelwa ngokukhulu,

alale angabe esavuka.”

₉Ngisho nomhlobo wami ebengimethemba,

ngimupha ukudla kwami, usengiphendukele.

₁₀Kepha Wena Simakade, ngihawukele, ungilulamise,

ukuze ngiziphindiselele ezitheni zami.

₁₁Ngalokho ngiyazi ukuthi uyangithanda,

ukuze isitha sami singaqhoshi ngami.

₁₂Mina uyakungigcina ngiqotho,

ungihlalise ebukhoneni bakho

kuze kube phakade.

₁₃Makabongwe uSimakade uNkulunkulu ka-Israyeli,

kusukela phakade kuze kube phakade.

Amen, Amen.