AMahubo 52

₁We siqhwaga,

uziqhayiselani ngokubi na?

Umusa kaNkulunkulu

umi njalo.

₂Ulimi lwakho luhlale

lusongoza amacebo amabi,

njengensingo ebukhali,

wena menzi wobubi,

₃uthanda okubi

kunokuhle,

amanga kunokulungileyo. Sela

₄Wena lulimi lwenkohliso,

uthanda onke amazwi

abhubhisayo.

₅Kepha uNkulunkulu

uzokuqumba phansi

kuze kube phakade;

uzokubamba,

akukhiphe ethendeni lakho,

akusiphule nasezweni

labaphilayo. Sela

₆Abalungileyo

bayokubona lokho,

besabe;

bakuhleke, bathi:

₇“Bheka, nasi isiqhwaga

esingazange simenze uNkulunkulu

abe yinqaba yaso,

kodwa sethembela ebuningini

bomcebo waso,

sabambelela kakhulu

ebubini baso.”

₈Kepha mina ngifana nesihlahla

somhlwathi esiluhlaza,

endlini kaNkulunkulu.

Ngethembele emseni kaNkulunkulu

kuze kube phakade.

₉Ngizokudumisa kuze kube phakade,

ngokuba ukwenzile lokho.

Ngizolindela igama lakho,

ngokuba lihle phambi

kwabathembekile bakho.