AMahubo 55

₁Nkulunkulu, lalela umkhuleko wami,

ungazifihli ekunxuseni kwami.

₂Ngizwele, ungiphendule;

ngikhathazekile, ngiyabubula, ngixakekile,

₃ngenxa yezwi lesitha,

nangenxa yokucindezela komubi,

bagingqela okubi phezu kwami,

bangizingela bengithukuthelele.

₄Inhliziyo yami iyathuthumela ngaphakathi,

ukwesaba ukufa kungehlele.

₅Nginengebhe, ngiyaqhaqhazela,

ngikhungethwe wukwesaba.

₆Ngibe sengithi:

“Ukuba benginamaphiko njengejuba,

ngabe ngindizela kwelikude,

ngihlale khona nginethezeke.”

₇Bengiyakubaleka, ngiye kude,

ngihlale ehlane. Sela

₈Bengizophuthuma ngithole umpheme

ukuze ngiphephe ezivunguvungwini naseziphephweni.

₉Bahlakaze, Nkosi, uphithanise ulimi lwabo,

ngokuba ngibone ubudlova nengxabano emzini.

₁₀Emini nasebusuku, bazulazula bezungeza phezu

kwezingange zawo,

inkohlakalo nenkathazo kukuwo.

₁₁Incithakalo itholakala kuwo,

ingcindezelo nenkohliso akusuki esigcawini sawo.

₁₂Ukuba bengiklolodelwa yisitha,

bengizokubekezelela lokho,

nokuba bekungongizondayo

oziphakamise phezu kwami, bengizomcashela.

₁₃Kepha nguwe ntanga yethu,

mhlobo wami nomngani wami.

₁₄Besihlala ndawonye kamnandi;

besihamba simshungu munye

siya endlini kaNkulunkulu

nebandla elithokozayo.

₁₅Ukufa makubazume,

behlele endaweni yabafileyo besaphila,

ngokuba ububi busezindlini zabo,

phakathi kwabo.

₁₆Kepha mina ngizokhala kuNkulunkulu

uSimakade, uzongisindisa.

₁₇Ekuseni, emini nantambama ngizokhala kuye, ngibubule,

uzolizwa izwi lami.

₁₈Uyakuwukhulula umphefumulo wami ngokuthula,

empini engibhekene nayo,

ngokuba baningi abamelene nami.

₁₉UNkulunkulu esesihlalweni kwasemandulo uzongizwa, abathobise,

ngokuba abaphenduki,

futhi abamesabi uNkulunkulu.

₂₀Ugadla kulabo ahlalisene kahle nabo,

usijivazile isivumelwano sakhe,

₂₁amazwi akhe abushelelezi kunamafutha,

kodwa inhliziyo igaya izibozi.

₂₂Phonsa umthwalo wakho kuSimakade,

Yena uzokusimamisa.

Akayukuvuma naphakade

ukuba olungileyo azanyazanyiswe.

₂₃Wena Nkulunkulu uzobaphonsa emgodini ojulileyo

abantu abomele igazi nabakhohlisayo;

izinsuku zabo zokuphila

aziyukuba ngisho nayingxenye yazo,

kodwa mina ngizokwethemba Wena.