AMahubo 86

₁Simakade, beka indlebe yakho ungiphendule,

ngokuba ngilusizi, ngimpofu.

₂Londoloza umphefumulo wami,

ngokuba ngingoqotho;

Wena Nkulunkulu wami,

sindisa inceku yakho ekwethembayo.

₃Yiba nomusa kimi, Nkosi,

ngokuba ngikhala kuwe usuku lonke.

₄Thokozisa umphefumulo wenceku yakho,

ngokuba kuWena, Nkosi,

ngiyawuphakamisela umphefumulo wami.

₅Wena, Nkosi umuhle, ungothethelelayo,

unomusa omkhulu kubo bonke

abakhala kuwe.

₆Simakade, lalela umkhuleko wami,

uzwe izwi lokunxusa kwami.

₇Ngosuku lokuhlupheka kwami ngikhala kuwe,

ngokuba uzongiphendula.

₈Phakathi kwabo bonke onkulunkulu,

akekho onjengawe, Nkosi,

akukho okunjengemisebenzi yakho.

₉Zonke izizwe ozidalileyo zizofika,

zikhuleke phambi kwakho, Nkosi,

zidumise igama lakho,

₁₀ngokuba Wena umkhulu,

wenza izimangaliso,

unguNkulunkulu, Wena wedwa.

₁₁Simakade, ngifundise indlela yakho,

ngizohamba eqinisweni lakho.

Inhliziyo yami yenze

iqonde into eyodwa vo,

yesabe igama lakho.

₁₂Nkosi Nkulunkulu wami,

ngikubonga ngenhliziyo yami yonke,

igama lakho ngilidumise

kuze kube phakade,

₁₃ngokuba umusa wakho

phezu kwami mkhulu,

ukhulule umphefumulo wami

endaweni yabafileyo ephansi.

₁₄Nkulunkulu, izedeleli zingivukele,

isigejana sezixhwanguxhwangu sizingele umphefumulo wami,

sangaba nandaba nawe.

₁₅Wena Nkosi unguNkulunkulu ohawukelayo,

unomusa nokubekezela,

uvame ubumnene nokwethembeka.

₁₆Phendukela ngakimi, ube nomusa kimi,

inceku yakho yiphe amandla akho,

usindise indodana yencekukazi yakho.

₁₇Ngibonise isibonakaliso somusa wakho,

ukuze abangizondayo bakubone lokho, bajabhe,

ngokuba Wena Simakade, uyangisiza, uyangiduduza.