UPawula Ufisa Abakwa-Israyeli Basindiswe
1Bazalwane, isifiso senhliziyo yami nokunxusa kwami kuNkulunkulu ngukuba abakwa-Israyeli basindiswe. 2Ngokuba ngiyabafakazela ukuthi banayo intshisekelo kaNkulunkulu, kodwa engasuki ekwazini, 3lokhu bengakwazi ukulunga kukaNkulunkulu, bafuna ukumisa okwabo ukulunga; abakuthobelanga ukulunga kukaNkulunkulu. 4Ngokuba isiphetho somthetho nguKhristu, kube ngukulunga kubo bonke abakholwayo. 5UMose waloba mayelana nokulunga okuza ngomthetho, ukuthi umuntu owenza ukulunga okuvela emthethweni, uyakuphila ngakho. 6Kepha ukulunga okuvela ngokukholwa kuthi: “Ungasho enhliziyweni yakho uthi: ‘Ngubani ozakwenyukela ezulwini na?’ okungukuthi ukwehlisa uKhristu, 7noma uthi: ‘Ngubani ozakwehlela endaweni yabafileyo na?’ ” okungukuthi ukukhuphula uKhristu kwabafileyo. 8Kepha kuthini na? Izwi liseduze nawe, emlonyeni wakho nasenhliziyweni yakho, okungukuthi izwi lokukholwa esilishumayelayo. 9Ngokuba uma uvuma ngomlomo wakho ukuthi uJesu uyiNkosi, ukholwa enhliziyweni yakho ukuthi uNkulunkulu wamvusa kwabafileyo, uyakusindiswa. 10Ngokuba umuntu ukholwa ngenhliziyo kube ngukulunga, avume ngomlomo wakhe kube ngukusindiswa. 11Umbhalo uthi: “Bonke abakholwa kuye abayukujabhiswa.”
12Ngokuba akukho mahluko phakathi komJuda nomGriki, lokhu Yena uyiNkosi yabo bonke, futhi ubacebele bonke abakhuleka kuye, 13ngokuba: “Bonke abakhuleka egameni leNkosi bayakusindiswa.”
14Kepha bayakukhuleka kanjani kulowo abangakholwa nguye na? Bayakukholwa kanjani kuye bengezwanga ngaye na? Bayakuzwa kanjani kungekho oshumayelayo na? 15Bayakushumayela kanjani uma bengathunywa na? Njengokuba kulotshiwe ukuthi:
“Yeka, zinhle kangakanani izinyawo
zabashumayela izindaba ezinhle.”
16Kepha abalilalelanga bonke ivangeli. Ngokuba u-Izaya, uthi: “Nkosi, ngubani owakholwa ngumbiko wethu na?”
17Ngakho-ke ukukholwa kuvela ngokuzwa, ukuzwa kuvela ngezwi likaKhristu. 18Kepha ngithi: abezwanga yini na? Impela bezwa kahle:
“Izwi labo liphumele emhlabeni wonke,
namazwi abo emikhawulweni yomhlaba.”
19Kepha ngithi: u-Israyeli akazanga yini na? Okokuqala, uMose uthi:
“Mina ngiyakunenza nibe nesikhwele ngabangesiso isizwe,
nginithukuthelise ngesizwe esingenakuqonda.”
20Kepha u-Izaya unesibindi sokuthi:
“Ngafunyanwa yilabo abangangifunanga,
ngabonakala kulabo abangangibuzanga.”
21Kepha ku-Israyeli uthi:
“Usuku lonke ngelulela izandla zami
esizweni esingalaleliyo nesiphikisayo.”
