ISihlabelelo Sezihlabelelo 1

₂Makangiqabule

ngokuqabula komlomo wakhe!

Uthando lwakho

lumnandi kunewayini.

₃Amafutha akho

athaphuka iphunga elimnandi,

igama lakho linjengamafutha

atheliweyo;

yingakho izintombi

zikuthanda nje.

₄Ngidonse ngikulandele, sigijime.

Inkosi isingingenisile

emakamelweni ayo.

Siyojabula, sithokoze ngawe;

uthando lwakho siyolukhumbula

ukwedlula iwayini.

Abalungileyo bayakuthanda.

₅Madodakazi aseJerusalema,

ngimnyama kodwa ngimuhle.

Nginjengamathende akwaKhedari,

nanjengamakhethini kaSolomoni.

₆Ningabuki ukuthi ngimnyama,

ngifuswe yilanga.

Amadodana esizalwa

mfazi munye nawo,

angithukuthelele,

angenza umlindizivini,

ngangabe ngisasilinda esami.

₇Ngitshele wena othandwa

ngumphefumulo wami,

umhlambi wakho uweluselaphi,

uwuphumuzelaphi emini na?

Kungani kumele ngihambe

ngicinga emihlanjini

yabangani bakho,

njengowesifazane ogubuzele

ngemvakazi na?

₈Uma ungazi,

wena omuhle

kunabo bonke abesifazane,

landela imizila yomhlambi,

weluse amazinyane akho

ngasemathendeni abelusi.

₉Ngikufanisa nehhashi lami lensikazi

phakathi kwezinqola zempi kaFaro,

sithandwa sami.

₁₀Izihlathi zakho zinhle

zinemicu yobuhlalu,

intamo yakho inemigexo.

₁₁Sizokwenzela imigexo yegolide

enobuhlalu besiliva.

₁₂Ngesikhathi inkosi

isahleli etafuleni layo,

inadi lami lathaphuka

iphunga lalo.

₁₃Othandiweyo wami uyisigaxa semure kimi,

ulala phakathi kwamabele ami.

₁₄Othandiweyo wami kimi

ufana nesixha sehena

ezivinini zase-Eni Gedi.

₁₅Waze wamuhle sithandwa sami!

Bheka, umuhle,

amehlo akho angamajuba.

₁₆Bheka, umuhle,

wena othandiweyo wami,

yebo, uyathokozisa.

Indawo esicambalala kuyo iluhlaza.

₁₇Imishayo yezindlu zethu iyimisedari,

uphahla luyimisayiphuresi.