UZefaniya 3

₁Maye, kohlubukileyo nongcolileyo,

umuzi wencindezelo!

₂Awulilaleli izwi,

awukwemukeli ukuyalwa,

awethembeli kuSimakade,

awusondeli kuNkulunkulu wawo.

₃Izikhulu zawo zingamabhubesi abhodlayo,

abehluleli bakhona bangamankentshane asebusuku,

abashiyi lutho okwangomuso.

₄Abaphrofethi bawo bayizichwensi nabakhohlisi.

Abaphristi bawo bayingcolisile indawo engcwele,

bawephula umthetho.

₅USimakade ulungile kuwo,

akakwenzi okungalungile.

Njalo ekuseni ukhipha isehlulelo

sakhe ekukhanyeni,

akehluleki,

kepha abangalungile abalazi ihlazo.

₆“Ngiziqothulile izizwe,

imibhoshongo yazo iyincithakalo,

ngenze imigwaqo yazo amagebhugebhu,

ukuze kungadluli muntu kuyo,

imizi yazo icekelwe phansi

yasala dengwane.

₇Ngathi: ‘Impela uyakungesaba,

ukwemukele ukuyalwa.’

Indawo yawo yokuhlala ayiyukushatshalaliswa,

kungenzeki konke engiwunqumele khona.

Kodwa noma kunjalo,

bavuka ekuseni benze inkohlakalo

ngazo zonke izenzo zabo.

₈“Ngakho-ke ngilindeni,” kusho uSimakade,

“kuze kube lusuku engisukuma ngalo ngiphange,

ngokuba kuyisinqumo sami ukuqoqa izizwe,

ngihlanganise ndawonye imibuso,

ukuba ngithululele kuzo intukuthelo yami,

lonke ulaka lwami oluvuthayo,

ngokuba wonke umhlaba

uyakungqongqiswa ngumlilo womhawu wami.”

₉“ ‘Ngokuba ngaleso sikhathi

ngiyakunika abantu izindebe zomlomo ezihlanzekileyo,

ukuze bonke babize igama likaSimakade,

bamkhonze bemunye.

₁₀Kusukela phesheya kwemifula eKhushe

abanxusa kimi,

indodakazi yabahlakazekileyo bami,

bayakuletha umnikelo wami.

₁₁Ngalolo lusuku awuyukuba namahloni

ngazo zonke izenzo zakho

owahlubuka ngazo kimi,

ngokuba ngiyakususa kuwe

abajabulela ukuzigqaja kwabo;

awusayukuphinde uzikhukhumeze futhi

entabeni yami engcwele.

₁₂Kepha ngiyakushiya kuwe

abantu abahluphekileyo nabampofu;

bayakukhosela egameni likaSimakade.

₁₃Insali yakwa-Israyeli ayiyukwenza okubi,

ayiyukuwaqamba amanga,

futhi akuyukutholakala emlonyeni wayo

ulimi lwenkohliso.

Impela iyakudla, ilale phansi,

kungabi bikho oyethusayo.’ ”

₁₄Hlokoma ngentokozo ndodakazi yaseZiyoni,

umemeze, Israyeli,

uthokoze, futhi ujabule ngenhliziyo yonke,

ndodakazi yaseJerusalema.

₁₅USimakade usisusile isigwebo sakho,

wasixosha nesitha sakho.

INkosi yakwa-Israyeli, uSimakade,

iphakathi kwakho,

awusayukwesaba futhi okubi.

₁₆Ngalolo lusuku kuyakuthiwa kulo iJerusalema:

“Ungesabi, Ziyoni!

Izandla zakho mazingayethi.

₁₇USimakade uNkulunkulu wakho unawe,

iqhawe eliyakukunqobisa.

Uyakukujabulela kakhulu wena,

athule othandweni lwakhe,

akuthokozele ngokuhlokoma kwentokozo.”

₁₈“Labo abadabuka ngemikhosi

enqunyiweyo ngiyakubaqoqa,

ngibasuse kuwe,

bangumthwalo nehlazo kuwe.

₁₉Uyabona-ke, ngaleso sikhathi

ngiyakubhekana ngqo nabo bonke abakuhluphayo,

ngisindise abaqhugayo,

ngiqoqe abaxoshiweyo,

ngibenze babe nodumo negama

abahlazeka emhlabeni wonke.

₂₀Ngaleso sikhathi ngiyakunibuyisa,

lapho nginiqoqa,

ngokuba ngiyakunenza nibe negama nodumo

kubo bonke abantu bomhlaba,

mhla ngiguqula ukuthunjwa kwenu

nizibonela ngawenu amehlo,” kusho uSimakade.