2 USamuweli 22

“USimakade uyidwala lami,

nenqaba yami,

nomkhululi wami.

₃UNkulunkulu uyidwala lami

engiphephela kulo,

isihlangu sami,

nophondo lwensindiso yami,

inqaba yami ephephileyo

nesiphephelo sami;

msindisi wami,

uyangisindisa ebudloveni.

₄Ngimemeza uSimakade

ofanele ukudunyiswa,

ngisindiswe ezitheni zami.

₅“Amagagasi okufa angihaqa;

izikhukhula zobubi zangisibekela.

₆Izintambo zendawo yabafileyo zangizungeza,

izihibe zokufa, zangehlela.

₇Ekuhluphekeni kwami ngambiza uSimakade,

ngambiza uNkulunkulu wami;

walizwa izwi lami esethempelini lakhe.

Ukukhala kwami kwafinyelela ezindlebeni zakhe.

₈“Umhlaba wawusuzamazama,

wandindizela;

izisekelo zezulu zathuthumela,

zaqhaqhazela, ngokuba ethukuthele.

₉Kwaphuma intuthu emakhaleni akhe,

nomlilo oqothulayo emlonyeni wakhe,

namalahle avuthayo kuye.

₁₀Wadabula amazulu, wehla;

isigayegaye sobumnyama sasiphansi kwezinyawo zakhe.

₁₁Wakhwela phezu kwekherubhi, wandiza;

wabonwa emaphikweni omoya.

₁₂Wenza ubumnyama bube ngamadokodo amphahlayo,

amanzi aqoqane,

amafu abe nzima yimvula.

₁₃Ekukhazimuleni okuphambi kwakhe

kwavutha amalahle omlilo.

₁₄USimakade waduma ezulwini;

Ophezukonke walizwakalisa izwi lakhe.

₁₅Wathuma imicibisholo,

wabangquzula, yebo,

ngonyazi wabadidizelisa.

₁₆Kwembulwa izisekelo zolwandle,

nezisekelo zomhlaba zabonakaliswa

ngenxa yokuthetha kukaSimakade,

nokufutha kwamakhala akhe.

₁₇Waselula isandla sakhe ephezulu,

wangibamba;

wangikhipha emanzini amaningi.

₁₈Wangisindisa esitheni sami esinamandla

nakubo abangizondayo,

ngokuba babenamandla amakhulu kunami.

₁₉Bangihlasela ngosuku engehlelwa ngalo yinhlekelele,

kodwa uSimakade waba yinsika yami.

₂₀Wangikhiphela endaweni ebanzi:

wangikhulula,

ngokuba ethokoza ngami.

₂₁“USimakade ungivuzile ngokulunga kwami,

wangibuyisela njengobumsulwa bezandla zami.

₂₂Ngizigcinile izindlela zikaSimakade;

angikwenzanga okubi ngokufulathela uNkulunkulu wami.

₂₃Imithetho yakhe yayiphambi kwami,

nezimiso zakhe angichezukanga kuzo.

₂₄Ngangimsulwa kuye;

ngazigcina, angenza okubi.

₂₅USimakade wangivuza ngangokulunga kwami,

nanjengokuhlanzeka kwami

phambi kwamehlo akhe.

₂₆“Kothembekileyo, uzibonakalisa ethembekile;

kumuntu oqotho, uziveza eqotho.

₂₇Kohlanzekileyo, uzibonakalisa ehlanzekile;

koyisigwegwe, azibonakalise enenkani.

₂₈Uyabasindisa abantu abathobekileyo,

kodwa amehlo akho

akulabo abaqhoshayo

ukuze ubathobise.

₂₉Wena Simakade uyisibani sami;

uSimakade uyabuguqula ubumnyama bami

bube ngukukhanya.

₃₀Ngawe ngingahlasela impi;

ngoNkulunkulu wami ngingeqa ugange.

₃₁Indlela kaNkulunkulu iphelele;

izwi likaSimakade lihlanzekile;

Yena uyisihlangu sabo bonke abaphephela kuye.

₃₂“Ngubani onguNkulunkulu ngaphandle kukaSimakade,

ngubani oyidwala

ngaphandle kukaNkulunkulu wethu na?

₃₃UNkulunkulu uyangibhincisa amandla;

indlela yami uyenza iqonde.

₃₄Yena wenza izinyawo zami

zibe njengezendlunzelakazi,

angimise ezindaweni eziphakemeyo.

₃₅Ufundisa izandla zami ukulwa,

ukuze izingalo zami zinsale umnsalo wethusi.

₃₆Wena unginikile isihlangu sensindiso yakho;

ukungilalela kwakho, kungikhulise kakhulu.

₃₇Wandise izinyathelo zami,

ukuze amaqakala ami angaxegi.

₃₈“Ngazixosha izitha zami, ngazibhubhisa;

angibuyanga ngingakaziqedi nya.

₃₉Ngaziqeda, ngaziphahlaza,

zaze zehluleka ukuvuka;

zawa phansi kwezinyawo zami.

₄₀Wangibhincisa amandla okulwa;

ababengivukele wabathobisa phansi kwami.

₄₁Wangifulathelisela izitha zami,

nabangizondayo ngabaqothula.

₄₂Bakhala, kepha akubanga bikho obasindisayo,

bakhala nakuSimakade,

kodwa akabaphendulanga.

₄₃Ngabashaya ngabacolisisa njengothuli lomhlabathi;

ngabadovadova njengodaka emgwaqweni.

₄₄“Wangikhulula ekulweni kwabantu;

wangilonda ngaba yinhloko yabezizwe;

abantu engingabaziyo bayakungikhonza.

₄₅Abafokazi bazithoba phansi kwami;

banele bezwa nje ngami, bangihlonipha.

₄₆Abafokazi badangala,

baphuma ezinqabeni zabo bethuthumela.

₄₇“USimakade uyaphila malidunyiswe idwala lami.

Makaphakanyiswe uNkulunkulu,

idwala lensindiso yami.

₄₈UNkulunkulu onginika impindiselo,

othobise izizwe phansi kwami.

₄₉Ungikhiphe ezitheni zami,

wangiphakamisela phezu kwabangivukelayo,

wangihlenga kumuntu oyisidlova.

₅₀Ngakho-ke ngizokubonga Simakade

phakathi kwabezizwe,

ngilihubele igama lakho.

₅₁Uyenza insindiso ibe nkulu kakhulu enkosini;

umenzele umusa uDavide,

ogcotshiweyo wakho,

nabozalo lwakhe,

kuze kube phakade.”