U-Amose 4

nina zinkomo zaseBhashani

enisentabeni eSamariya,

enicindezela abampofu,

niphathe kabi abantulayo,

enithi emakhosini enu:

“Lethani, siphuze.”

₂INkosi uSimakade ifungile ngobungcwele bayo,

yathi: “Bhekani-ke, ziyonifikela

izinsuku lapho niyakuthathwa ngezingwegwe,

nezizukulwane zenu ngezindobo zokudoba.

₃Niyakuphuma ngamunye ngamunye ngezintuba,

nilahlwe eHermoni,”

kusho uSimakade.

₄“Wozani eBhethele, nizokona,

naseGiligali, nizokwandisa iziphambeko,

nilethe imihlatshelo yenu njalo ekuseni,

nokweshumi kwenu ngezinsuku ezintathu.

₅Nishise umnikelo wokubonga ngokunemvubelo,

nimemezele iminekelo yesihle,

niqhoshe ngayo,

ngokuba nithanda ukwenza kanjalo,

bantu bakwa-Israyeli,” kusho iNkosi uSimakade.

₆“Mina nganilethela indlala

kuyo yonke imizi yenu,

nokuntula isinkwa

kuzo zonke izindawo zenu,

kodwa anibuyelanga kimi,” kusho uSimakade.

₇“Nganigodlela futhi nemvula,

kusasele izinyanga ezintathu kuvunwe;

ngayidedela komunye umuzi;

ngangalinisa komunye,

ngayidedela kwesinye isiqephu sezwe,

ngangalinisa kwesinye isiqephu,

kwathi isiqephu engananga kuso sasha.

₈Imizi emibili noma emithathu yadiyazela,

yaya komunye umuzi ukuyophuza amanzi,

kodwa ayaneliswanga;

nakuba kunjalo

kepha anibuyelanga kimi,” kusho uSimakade.

₉“Nganishaya ngokuhwamuka nesikhutha;

izivande zenu ezininingi,

izivini zenu, imikhiwane yenu

neminqumo yenu kwadliwa yisikhonyane,

kodwa anibuyelanga kimi,” kusho uSimakade.

₁₀“Nganithumelela ubhubhane

ngendlela efanayo neyaseGibhithe,

ngazibulala ngenkemba izinsizwa zenu,

ngathumba amahhashi enu,

ngenza ukuba iphunga lokunuka kwenkambu yenu

likhuphukele emakhaleni enu,

kodwa anibuyelanga kimi,” kusho uSimakade.

₁₁“Ngababhubhisa abanye benu

njengalokhu uNkulunkulu abhubhisa iSodoma neGomora;

nanifana nesikhuni esophulwe emlilweni,

kodwa anibuyelanga kimi,” kusho uSimakade.

₁₂“Ngakho-ke ngiyakwenza kanjalo kuwe, Israyeli,

njengoba-ke ngiyakwenza lokhu kuwe,

zilungiselele ukuhlangana noNkulunkulu wakho, Israyeli.”

₁₃Uyabona-ke, Yena owabumba izintaba,

wadala umoya,

Yena otshela abantu imicabango yakhe,

owenza intathakusa ibe ngubumnyama,

ohamba ezindaweni eziphakemeyo zomhlaba,

igama lakhe nguSimakade,

uNkulunkulu Wamabandla.