UHabhakuki 2

₁Ngiyakuma endaweni yami yokulinda,

ngime embhoshongweni,

ngibheke ukuba ngibone

ukuthi uyakukhulumani ngami,

nokuthi ngiyakuphendula

ngithini ngokukhononda kwami.

₂USimakade wangiphendula wathi:

“Bhala phansi umbono,

uwenze ucace ezibhebheni

ukuze owufundayo asheshe nawo.

₃Ngokuba umbono usalokhu

ungowesikhathi esinqunyiweyo,

uyakushesha ufike esiphethweni,

awuyukukhohlisa;

nakuba uyakubambezeleka, ulinde,

ngokuba impela uyakufika,

awuyukwephuza.

₄Bheka, uyazikhukhumeza,

ingaphakathi lakhe aliqotho,

kodwa olungileyo uzakuphila

ngokukholwa kwakhe.

₅Impela, iwayini liyakhohlisa,

umuntu ozigqajayo akahlali ekhaya,

owandisa umphimbo wakhe

ufana nendawo yabafileyo;

akaneliswa njengokufa;

uziwolela zonke izizwe,

aziqoqele bonke abantu.

₆Abayukukhuza yini isaga ngaye

bampongoloze iculo bebhinqa

benze imfumbe ngaye,

omunye wathi:

“ ‘Maye, kulowo owandisa okungesikho okwakhe,

kuyoze kube nini na? –

lowo ozethwesa umthwalo onzima ngezibambiso!

₇Abayukuvuka yini ngokuzumayo

labo abakukhokhela inzuzo,

abayukuvuka bakuthuthumelise,

ube yimpango yabo na?

₈Phela wena uziphangile izizwe eziningi,

yonke insali yabantu iyakukuphanga nawe,

ngenxa yokuchitha igazi labantu

nobudlova obenziwe ezweni nasemzini,

nakubo bonke abahleli kuwo.’

₉Maye, kulowo ozuzela indlu yakhe

ngokungalungile inzuzo embi

ukuba abeke isidleke sakhe phezulu

ukuze azihlenge esandleni senhlekelele!

₁₀Amacebo owenzile athele indlu yakho ngehlazo

ngokubulala abantu abaningi

wenza isono kuwe uqobo.

₁₁Ngokuba amatshe ayakukhala esogangeni,

nomshayo uyakuphendula usophahleni.

₁₂Maye, kowakha umuzi ngokuchitha igazi,

asekele umzana ngobubi!

₁₃Uyabona-ke, akuveli yini kuSimakade Wamabadla,

ukuthi abantu bakhandleke

ukuze banelise umlilo,

nezizwe zizikhathaze ngokuyize na?

₁₄Ngokuba umhlaba uyakugcwala ukwazi

inkazimulo kaSimakade,

njengamanzi esibekela ulwadle.

₁₅“Maye, kophuzisa umakhelwane wakhe,

athulule ulaka lwakhe, amdakise,

ukuze abuke ubunqunu bakhe!

₁₆Uyakwaneliswa yihlazo kunokuhlonipheka,

uphuze nawe, ubalwe njengongasokile,

indebe yesandla sokunene sikaSimakade

iyakuza kuwe,

ihlazo libe phezu kodumo lwakho.

₁₇Ngokuba ubudlova obenziwe eLebhanoni buyakukuhaqa,

nokubhujiswa kwezilwane kukwesabise,

ngenxa yokuchithwa kwegazi labantu

nendluzula eyenziwe ezweni,

nasemzini, nakubo bonke abahleli kuwo.

₁₈Sisiza ngani isithombe,

ngokuba umbazi usibazile,

nesithombe esibunjiweyo nomfundisi wamanga,

ngokuba osibumbileyo wethembele kuwo

ngokwenza izithombe eziyizimungulu na?

₁₉Maye kothi okhunini: ‘Vuka!’

athi kulo itshe elithule: ‘Sukuma!’

Kungafundisa yini lokhu na?

Bheka, kunanyekwe ngegolide nangesiliva,

akukho kuphefumula kukho.

₂₀Kodwa uSimakade esethempelini lakhe elingcwele;

thula phambi kwakhe, mhlaba wonke.”