U-Izaya 45

₁“Usho kanje uSimakade

kogcotshiweyo wakhe, uKhoresi,

osandla sakhe sokunene ngisibambile

ukuba ngehlule izizwe phambi kwakhe,

ngihlubule amakhosi izembatho zawo,

ngivule iminyango phambi kwakhe;

amasango awasayukuvalwa.

₂Mina ngiyakuhamba phambi kwakho,

ngihlelembe amagebhugebhu,

ngephule izivalo zethusi,

nginqume imigoqo yensimbi.

₃Ngiyakukunika ingcebo yobumnyama,

nemfuyo ethukusiweyo ezindaweni ezifihlakeleyo,

ukuba wazi ukuthi nginguSimakade

okubiza ngegama lakho,

uNkulunkulu ka-Israyeli.

₄Ngenxa yenceku yami uJakobe,

u-Israyeli okhethiweyo wami,

ngikubizile ngegama lakho,

ngiyakukunika igama lodumo,

noma ungangazi.

₅Mina nginguSimakade,

akekho omunye uNkulunkulu

ngaphandle kwami;

ngiyakukubhincisa noma ungazange ungazi,

₆ukuze abantu bazi,

kusukela ekuphumeni kwelanga

kuze kube sekushoneni kwalo,

ukuthi akekho omunye ngaphandle kwami;

Mina nginguSimakade,

akekho omunye;

₇yimi engenza ukukhanya

nengidala ubumnyama,

ngenza ukuthula,

ngidale inhlekelele;

nginguSimakade owenza konke lokho.

₈“Consani mazulu phezulu,

amafu athulule ukulunga;

umhlaba mawuvuleke,

kuthelwe ukusindiswa,

kumile nokulunga;

Mina Simakade ngikudalile.

₉“Maye, kuye olwa noMenzi,

udengezi phakathi kwezindengezi zomhlabathi!

Ibumba liyakusho yini

kolibumbayo, lithi:

‘Wenzani na?’

nomsebenzi wakho, uthi:

‘Akanazo yini izandla na?’

₁₀Maye, kulowo othi kuyise:

‘Uzalani na?’

nakowesifazane, athi:

‘Unemihelo ngani na?’

₁₁“Usho kanje uSimakade,

oNgcwele ka-Israyeli

noMenzi wakhe, uthi:

‘Ningibuza ngezinto ezizayo,

nangabantwana bami,

ningiyale ngomsebenzi wezandla zami na?

₁₂Yimi engiwenzile umhlaba,

ngadala abantu phezu kwawo;

yizandla zami ezaleneka izulu,

ngayala wonke amaviyo alo.

₁₃Mina ngimvusile lona ngokulunga;

ngiyakuhlelemba zonke izindlela zakhe;

uyakuwakha umuzi wami,

avumele abathunjwa bami

ukuba bahambe,

kungabi ngomfumbathiso nangesipho,’

kusho uSimakade Wamabandla.”

“Ingcebo yaseGibhithe

nokuzuziweyo kwaseKhushe,

nangamaShebha, abantu abade;

kuyakuza kuwe, kube ngokwakho;

bayakukulandela, bafike beboshwe ngamaketanga;

bakukhothamele, bakhuleke kuwe, bathi:

‘UNkulunkulu unani kuphela,

akekho omunye,

akekho omunye uNkulunkulu

ngaphandle kwakhe.’ ”

₁₅Impela unguNkulunkulu ozifihlayo,

uNkulunkulu ka-Israyeli, osindisayo.

₁₆Bayakujabha bonke ngothi lwabo,

babe namahloni,

bayokuhamba bedumele bonke abenza izithombe.

₁₇Kepha u-Israyeli usindisiwe nguSimakade,

ngokusindiswa okuphakade;

aniyukujabha, aniyukuba namahloni

kuze kube phakade.

₁₈Ngokuba usho kanje uSimakade, owadala izulu,

uNkulunkulu, owabumba umhlaba;

wawenza, wawumisa,

engawudalelanga ize;

wawubumba ukuba kuhlalwe kuwo, uthi:

“NginguSimakade, akekho omunye.

₁₉Angikhulumanga ekusithekeni,

endaweni emnyama emhlabeni;

angishongo kwabozalo lukaJakobe, ngathi:

‘Ngifuneni ngeze.’

Mina Simakade ngikhuluma ukulunga,

ngimemezela okuqotho.

₂₀“Qoqanani ndawonye nize,

sondelani nina abasindileyo bezizwe;

abanalwazi abathwala umuthi

wezithombe zabo ezibaziweyo,

bakhuleka kunkulunkulu ongenakusindisa.

₂₁Kumemezeleni, nikuveze;

yebo, mabaxoxe.

Ngubani owakubikezela lokhu endulo,

wakumemezela esikhathini sasemandulo na?

AkusiMina Simakade na?

Akekho uNkulunkulu ngaphandle kwami,

uNkulunkulu olungileyo noMsindisi,

akekho ngaphandle kwami.

₂₂“Nina nonke mikhawulo yomhlaba,

phendukelani kimi, nisindiswe,

ngokuba nginguNkulunkulu, akekho omunye.

₂₃Ngizifunge Mina,

izwi liphumile emlonyeni wami ngokulunga,

aliyukubuyela emuva:

wonke amadolo, ayoguqa kimi

nezilimi zonke ziyofunga.

₂₄Kuyothiwa ngami:

‘KukuSimakade kuphela ukulunga namandla.’ ”

Bonke ababemthukuthelele

bayakufika kuye, bajabhe.

₂₅KuSimakade zonke izizukulwane zika-Israyeli

ziyolungisiswa, zibe nodumo.