U-Izaya 50

“Iphi incwadi yesehlukaniso engimlahle ngayo?

Ngumuphi konyoko engimxoshile,

ngubani enginesikweletu naye,

engithengise ngani kuye na?

Bhekani, nathengiswa ngenxa yobubi benu,

nangeziphambeko zenu;

unyoko walahlwa.

₂Yini eyenza kungabi bikho muntu

lapho ngifika na?

Kungani kungasabelanga muntu

nalapho nginibiza na?

Ngabe isandla sami sifinyeziwe yini

ukuba singahlengi na?

Noma angisenamandla okukhulula na?

Ngokukhuza kwami ngiyomisa ulwandle,

ngenze imifula ibe yihlane,

izinhlanzi zayo zinuke;

ngokuba engekho amanzi,

ziyofa zibulawa wukoma.

₃Amazulu ngiwembathisa ubumnyama,

ngenze indwangu eyisaka

ibe yisembozo sawo.”

₄INkosi uSimakade inginikile ulimi lwabafundi

ukuze ngikwazi ukuqinisa okhatheleyo ngezwi;

njalo ekuseni ivusa indlebe yami,

ukuba ngilalele njengofundiswayo.

₅INkosi uSimakade iyivulile indlebe yami,

mina angihlubukanga,

angihlehlanga nyovane.

₆Nganika abashayi umhlane,

nezihlathi zami kubo abahluthula isilevu;

angibusithelisanga ubuso bami

ekungcofweni nasekufelweni ngamathe.

₇Ngokuba iNkosi uSimakade iyangisiza;

ngakho-ke angizange ngithunazwe,

ngalokho ubuso bami ngibumisile njengensengetsha,

ngiyazi ukuthi angiyukujabha.

₈Ongikhiphe phambili ecaleni useduze;

ngubani oyomelana nami na?

Masime kanyekanye;

ngubani omelene nami na?

Makasondele kimi.

₉Mina phela iNkosi uSimakade iyangisiza;

ngubani oyongilahla ngecala na?

Bonke bayoguga njengengubo,

badliwe yizinundu.

₁₀Ngubani phakathi kwenu omesabayo uSimakade,

olilalelayo izwi lenceku yakhe,

ohamba ebumnyameni,

engenakho ukukhanya

kodwa ethembela egameni likaSimakade,

futhi encika kuNkulunkulu wakhe na?

₁₁Bhekani, nina nonke eningabaphemba umlilo,

enibhinca uthuthuva,

dabulani emalangabini omlilo wenu,

naphakathi kodweshu eniluphembileyo.

Nakhu eniyakukwamukela kuvela esandleni sami;

niyakulala phansi ngobuhlungu.