U-Izaya 60

₁“Vuka ukhanye,

ngokuba ukukhanya kwakho kufikile;

nenkazimulo kaSimakade

iphumele phezu kwakho.

₂Ngokuba ubumnyama buyakusibekela umhlaba,

nesigayegaye abantu,

kodwa uSimakade uyakuphuma phezu kwakho,

nenkazimulo yakhe iyobonakala phezu kwakho.

₃Izizwe ziyokuza namakhosi ekukhazimuleni

kokuphuma kwakho.

₄“Phakamisa amehlo akho,

ubone nxazonke;

bonke bayaqoqana beza kuwe,

amadodana akho ayovela endaweni ekude,

namadodakazi akho ayofika ebelethwe.

₅Khona uyakukubona lokho,

uchachambe yinjabulo;

inhliziyo yakho igide, ithokoze,

ngokuba ingcebo yasolwandle iyakulethwa kuwe,

ingcebo yezizwe ize kuwe.

₆Ubuningi bamakameli buyakukusibekela,

amakameli asemancane akwaMidiyani nase-Efa;

bonke abaseShebha bayakuza,

bethwele igolide nempepho,

bememezele izindumiso zikaSimakade.

₇Yonke imihlambi eKedari iyoqoqelwa kuwe,

nezinqama eNebhayothi ziyakukukhonza,

ziyakukhuphukela e-althare lami

ngokuthanda kwami;

ngiyenze ibe yinhle indlu

yodumo lwami.

₈“Ngobani laba abandiza njengefu,

nanjengamajuba eya ezidlekeni zawo na?

₉Iziqhingi ziyakungilindela,

imikhumbi yaseTharishishi iyoba ngeyokuqala

ukuletha amadodana akho evela kude,

ephethe isiliva negolide lawo,

ekulethe egameni likaSimakade

uNkulunkulu wakho,

nakoNgcwele ka-Israyeli,

okudumisile.

₁₀“Abezizwe bayakwakha izingange zakho,

amakhosi abo akukhonze;

noma ngakushaya ngentukuthelo yami,

manje sengiyakuhawukela ngomusa wami.

₁₁Amasango akho ayohlala evulekile,

awayukuvalwa imini nobusuku,

ukuze ingcebo yezizwe ilethwe kuwe,

namakhosi azo eqhutshwa.

₁₂Ngokuba isizwe nombuso okungeke

kukukhonze kuyophela;

yebo, lezo zizwe ziyakuqedwa nya.

₁₃“Inkazimulo yaseLebhanoni iyakuza kuwe,

umsayiphuresi, ishoba nomkhoba

konke kanyekanye,

kuyohlobisa indawo yendlu yami engcwele,

ngiyikhazimulise indawo yezinyawo zami.

₁₄Amadodana alabo abakuhluphileyo

ayoza kuwe ekhokhoba, ekuhlonipha,

nabo bonke abakwedelelayo

bayokhothama ngasematheni ezinyawo zakho,

bakubize ngokuthi nguMuzi kaSimakade

neZiyoni loNgcwele ka-Israyeli.

₁₅“Nakuba bewushiyiwe, uzondwa,

kungasekho muntu odabula kuwe;

ngiyakukwenza ube yisivunulo saphakade,

nentokozo yezizukulwane ngezizukulwane.

₁₆Uyakuncela ubisi lwezizwe,

uncele emabeleni amakhosi;

uyokwazi ukuthi Mina Simakade

nginguMsindisi wakho,

noMhlengi wakho,

uMninimandla kaJakobe.

₁₇Esikhundleni sethusi ngiyoletha igolide,

esikhundleni sensimbi ngilethe isiliva;

esikhundleni somuthi ngilethe ithusi,

nasesikhundleni samatshe ngilethe insimbi.

Ngibeke ukuthula kube ngababonisi bakho,

nokulunga kube ngababusi bakho.

₁₈Ayisayukubabikho indluzula ezweni lakini,

nencithakalo nokubhubhisa

phakathi kwemingcele yakho,

kodwa izingange zakho

uyozibiza ngokuthi yiNsindiso,

namasango akho ngokuthi yiNdumiso.

₁₉Ilanga alisayukuba ngukukhanya kuwe emini,

nenyanga ayisayukukukhanyisela ngokukhazimula ebusuku;

uSimakade uyakuba ngukukhanya okuphakade kuwe,

uNkulunkulu wakho abe ludumo lwakho.

₂₀Ilanga lakho alisayukushona,

nenyanga yakho ayisayukufiphala,

ngokuba uSimakade uyakuba ngukukhanya okuphakade kuwe,

nezinsuku zokulila kwakho ziyakuphela.

₂₁Bonke abantu bakho bayakuba ngabalungileyo,

badle ifa lezwe kuze kube phakade;

igatsha lokutshala kwami,

umsebenzi wezandla zami,

ukuze ngidunyiswe.

₂₂Ingcosana iyakuba yinkulungwane,

omncane abe yisizwe esinamandla;

Mina nginguSimakade,

ngiyokwenza sisheshe isikhathi sakho.”