UJudithi 16

₁UJudithi wathi:

“Huba ingoma

kuNkulunkulu wami ngegekle,

ihubeleni iNkosi yami

ngamasimbali.

Phakamiselani kuyo ihubo elisha,

iphakamiseni, nibize igama layo.

₂Ngokuba iNkosi inguNkulunkulu

ocoboshisa aqede nya izimpi,

umisa ubukhona bakhe

phakathi kwabantu,

ungikhululile mina

esandleni sabangixoshayo.

₃Ama-Asiriya eza

edilika ezintabeni zasenyakatho.

Weza nezigidi zamabutho,

ubuningi bawo bavimba

imihosha ayagobhoza,

kwathi amabutho ahamba

ngezinyawo asibekela izintaba.

₄Bathi bazakushisa indawo yami,

babulale izinsizwa zami ngenkemba,

baphahlaze izinsana zami

emhlabathini,

bathathe abantwana bami

namatshitshi ami njengempango.

₅Kepha iNkosi uSomandla

ibafenyisile ngesandla

sowesifazane.

₆Ngokuba onamandla wabo

kawanga ngasandla sezinsizwa,

kawanga nangankemba yezidlakela,

kawanga nangasandla

semidondoshiya,

kodwa ngoJudithi indodakazi kaMerari

omehlule ngobuhle bobuso bakhe,

₇ngokuba wabeka phansi

ezakhe zobufelokazi

ukuze aphakamise u-Israyeli

ocindezelweyo,

wagcoba ubuso bakhe ngamakha,

₈wabopha izinwele zakhe ngebhande

wafaka isembatho selineni

ukuze amhehe.

₉Izicathulo zakhe

zawadonsa amehlo akhe,

ubuhle bakhe bathumba

ingqondo yakhe,

inkemba yakhe

yadla eyakhe intamo.

₁₀AbasePheresiya baqhaqhazela

bagcwala itwetwe

ngenxa yesibindi sakhe,

amaMede wona

ethuswa ngukugagamela kwakhe.

₁₁Abantu bami

abacindezelwe bamemeza,

abantekenteke bakhala

ngezwi elikhulu,

isitha savevezela;

saphakamisa iphimbo laso

sabaleka.

₁₂Amadodana ezigqilakazi

abajijimeza ngeklwa,

abalimaza njengezingane zobhacile.

Bashabalala phambi kweNkosi yami.

₁₃Ngiyakumhubela uNkulunkulu wami

ihubo elisha:

Awu! Nkosi Nkulunkulu,

umkhulu uyesabeka,

awunqobeki,

izikhwepha zakho ziyamangalisa.

₁₄Izidalwa zonke mazikukhonze,

ngokuba wakhuluma zabakhona.

Wathumela uMoya wakho zabakhona;

akekho ongamelana nezwi lakho.

₁₅Ngokuba izintaba

ziyakuzanyazanyiswa

kuze kube sezisekelweni zazo

kanye nezamanzi;

amadwala ancibilike phambi kwakho

njengenhlaka.

Kepha ubenzela umusa

labo abakwesabayo.

₁₆Ngokuba namuphi

umhlatshelo onephunga

uyinto encane kuwe.

Kanjalo namanoni

omhlatshelo ophelele

ayize leze kuwe.

Kepha lowo owesaba iNkosi

mkhulu ingunaphakade.

₁₇Maye kuso isizwe

esivukela abantu bami!

INkosi uSomandla

iyakuziphindisela kubo

ngosuku lokwahlulela,

iyakuthumela umlilo

nezimpethu enyameni yabo

bayakukhala besezinhlungwini

phakade naphakade.”