UJeremiya 27

₁Ekuqaleni kokubusa kukaJehoyakimi, indodana kaJosiya, inkosi yakwaJuda, leli lizwi lafika kuJeremiya livela kuSimakade, lithi: ₂usho kanje uSimakade kimi, uthi: “Zenzele izintambo namajoka, ukubeke entanyeni yakho, ₃ukuthumele enkosini yakwa-Edomi, kweyakwaMowabi, enkosini nakubantu bakwa-Amoni, kweyaseThire neyaseSidoni, ngesandla sezithunywa ezifike eJerusalema kuZedekiya, inkosi yakwaJuda. ₄Uyakuziyala ukuba zithi emakhosini azo: ‘usho kanje uSimakade Wamabandla, uNkulunkulu ka-Israyeli, uthi: “Niyakusho kanje emakhosini enu, nithi: ₅Mina ngenzile umhlaba, abantu nezilwane; okusebusweni bomhlaba; ngamandla ami amakhulu, nangezikhwepha zami, futhi ngikunika noma ngubani othandekayo emehlweni ami. ₆Manje nginikela wonke lawa mazwe esandleni sikaNebukhadinezari, inkosi yaseBhabhele, inceku yami, futhi ngimnika nezilwane zasendle ukuba zimkhonze. ₇Zonke izizwe ziyakumkhonza, yena nendodana yakhe, nendodana yendodana yakhe, kuze kufike isikhathi sokuwa kwezwe lakhe, izizwe eziningi namakhosi amakhulu ayomenza isikhonzi sawo. ₈Kuyakuthi isizwe nombuso okungayukumkhonza uNebukhadinezari, inkosi yaseBhabhele, okungayibekanga intamo yakho phansi kwejoka lakhe, leso sizwe ngiyosijezisa ngenkemba, ngendlala, nangobhubhane, ngisiqede ngesandla sakhe, kusho uSimakade. ₉Kepha nina ningabalaleli abaphrofethi benu, ababhuli benu, namaphupho enu, nabahlola imihlola phakathi kwenu, nabalumbi benu abakhuluma kini, bethi: ‘Aniyukuyikhonza inkosi yaseBhabhele,’ ₁₀ngokuba baphrofetha kini amanga, ukuze nisuswe ezweni lakini, niyiswe kude; ngiyakunixosha, niphele nya. ₁₁Kepha isizwe esiyakuyibeka intamo yaso phansi kwejoka lenkosi yaseBhabhele, siyikhonze; leso sizwe ngiyakusiyeka ezweni laso, sililime, sihlale kulo, kusho uSimakade.” ’ ”

₁₂Ngakhuluma amazwi afanayo enkosini yakwaJuda, uZedekiya, ngathi: “Bekani izintamo zenu phansi kwejoka lenkosi yaseBhabhele, niyikhonze, yona nabantu bayo, niphile. ₁₃Uyakufelani wena nabantu bakho ngenkemba, ngendlala nangobhubhane, njengalokho uSimakade akukhulumile maqondana nesizwe esingayukuyikhonza inkosi yaseBhabhele na? ₁₄Ningawalaleli amazwi abaphrofethi abakhuluma kini, bethi: ‘Aniyukuyikhonza inkosi yaseBhabhele,’ ngoba baphrofetha amanga kini. ₁₅‘Angibathumanga. Baphrofetha amanga egameni lami,’ kusho uSimakade. ‘Ngakho-ke ngizonixosha, niphele nya, nina nabaphrofethi abaphrofetha kini.’ ”

₁₆Ngase ngikhuluma kubaphristi nakubo bonke abantu ngithi usho kanje uSimakade, uthi: “Ningawalaleli amazwi abaphrofethi benu abaphrofetha kini, bethi: ‘Bhekani, izitsha zendlu kaSimakade ziyakubuyiswa eBhabhele masinyane.’ Ngokuba baphrofetha amanga kini. ₁₇Ningabalaleli; yikhonzeni inkosi yaseBhabhele ukuze niphile; kungani lo muzi ube ngowokubhujiswa na? ₁₈Uma-ke bengabaphrofethi, nezwi likaNkulunkulu likubo, mabanxuse kuSimakade Wamabandla, ukuba izitsha ezisasele endlini kaSimakade, esigodlweni senkosi yakwaJuda, naseJerusalema zingayi eBhabhele. ₁₉Usho kanje uSimakade Wamabandla ngezinsika, ngolwandle, ngezinqe nangezitsha ezisasele kulo muzi; ₂₀angazithathanga uNebukhadinezari, inkosi yaseBhabhele, ngesikhathi ethumba uJekhoniya, indodana kaJehoyakimi, inkosi yakwaJuda, eJerusalema, emyisa eBhabhele, nezikhulu zonke zakwaJuda naseJerusalema, ₂₁yebo, usho kanje uSimakade Wamabandla, uNkulunkulu ka-Israyeli ngempahla eyayisele endlini kaSimakade, nasesigodlweni senkosi yakwaJuda, naseJerusalema, uthi: ₂₂‘Iyakuyiswa eBhabhele, ihlale lapho, kuze kufike usuku engiyoyibuyisa ngalo, bese ngiyikhuphula, ngiyibuyisele kule ndawo,’ kusho uSimakade.”

“Bese ngiyibuyisa ngiyilethe kule ndawo.”