UJobe 39

₁“Uyasazi yini isikhathi

sokuzala kwezimbuzi zezintaba na?

Uke ukuqaphele yini

ukuzala kwezindluzelekazi na?

₂Ungazibala yini izinyanga zokumitha kwazo,

wazi nokuthi zizozala nini na?

₃Ziyakhonkobala lapho zizala amazinyane azo,

zikhululeke lapho sezizele.

₄Amazinyane azo ayaqina,

akhulela endle,

ahambe, angabe esaphindela kuzo.

₅“Ngubani ovumele imbongolo yasendle

ukuba ihambe?

Ngubani owathukulula izibopho zayo,

₆wenza ihlane laba yindlu yayo,

nezwe likasawoti,

indawo yayo yokuhlala na?

₇Iyawuhleka umsindo ovela emzini,

ayikuzwa ukumemeza komshayeli.

₈Iyahamba ezintabeni eziyidlelo layo,

ifuna lonke uhlaza.

₉“Inyathi ingavuma yini ukukusebenzela,

ihlale ebusuku emkhombeni wakho na?

₁₀Ungayibophela yini inyathi ukuba ilime,

noma ihlelembe esigodini emva kwakho na?

₁₁Ungayethemba yini,

ngoba amandla ayo emakhulu,

ushiye umshikashika wakho kuyo na?

₁₂Ungayethemba yini

ukuthi ingayibuyisa imbewu yakho,

iyibuthele esibuyeni sakho na?

₁₃“Intshe iphaphazela kamnandi ngamaphiko,

kodwa ngabe yizimpaphe

namaphiko othando na?

₁₄Ishiya amaqanda ayo emhlabathini,

afudunyezwe wuthuli.

₁₅Iyakhohlwa wukuthi unyawo lungawachoboza,

nokuthi isilwane sasendle singawanyathela.

₁₆Iwaphatha ngesihluku amazinyane ayo,

kube sengathi akusiwo awayo,

ayesabi ukuthi umshikashika wayo

ungase ube yize.

₁₇UNkulunkulu uyenze ukuba ikhohlwe ngukuhlakanipha,

akayabelanga ukuqonda.

₁₈Lapho indizela phezulu,

ihleka amahhashi nabagibeli bawo.

₁₉“Nguwe yini onika ihhashi amandla,

wembathise intamo yalo ngomhlwenga

oyephuzelayo na?

₂₀Nguwe yini olenza ligxume

njengesikhonyane na?

Ukuthimula kwalo okukhulu kuyesabeka.

₂₁Liphanda esigodini,

liyathokoza ngamandla alo,

liyaphuma libhekane ngqo nempi.

₂₂Ingebhe liyihleka usulu,

alesabi lutho,

alihlehli phambi kwenkemba.

₂₃Umgodla uyakhehlezela,

kubenyezele umkhonto nengcula.

₂₄Ngendluzula nangolaka,

ligabavula kakhulu,

alivinjwa wukukhala kwecilongo.

₂₅Uma kukhala icilongo,

lithi: ‘Nakho-ke;’

impi liyihogela isekude,

nomsindo wabakhuzi bayo

neziqubulo zempi.

₂₆“Ngabe kungokuhlakanipha kwakho yini

uklebe endiza,

elulele amaphiko akhe ngaseningizimu na?

₂₇Ukhozi lundizela phezulu yini

ngenxa yokusho kwakho,

lisakhe lapho phezulu isidleke salo na?

₂₈Luhlala esiweni, lwakhe khona,

iwa edwaleni liyinqaba yalo.

₂₉Luthi lulapho lube luhlola

ukudla kwalo,

amehlo alo akubona kukude.

₃₀Amazinyane alo aphuza igazi;

lapho kukhona okubulewe, nalo lukhona.”