UJobe 41

₁“Ungayidoba yini inkanyamba ngodobo,

noma ubophe ulimi lwayo ngentambo na?

₂Ungayifaka yini umkhala ekhaleni layo,

ubhoboze umhlathi wayo ngehhuku na?

₃Iyokwenza imikhuleko eminingi yini kuwe,

ikhulume amazwi athobekileyo na?

₄Iyosenza yini nawe isivumelwano

sokuba uyithathe,

ibe yinceku, kuze kube phakade na?

₅Ungadlala yini nayo njengenyoni,

uyibophe ngomchilo

ukuze amantombazane akho adlale nayo na?

₆Abathengi bangathengiselana yini ngayo,

abahwebi behlukaniselane ngayo na?

₇Isikhumba sayo ungasigwaza yini ngezinhlendla,

nekhanda layo ngemikhonto yokubamba izinhlanzi na?

₈Beka isandla sakho kuyo,

uzokhumbula impi ezosuka;

awusayukukuphinda lokho.

₉Ithemba lakho lokuyibamba liyimbude,

bonke baqumbeka phansi

uma beyibona.

₁₀Akekho onesibindi sokuba angayivusa.

Pho ngubani ongema phambi kwayo na?

₁₁Ngubani ongayisukela,

qede aphephe na?

Konke okuphansi kwezulu kungokwami.

₁₂“Angiyukuthula ngezitho zayo,

nangendaba yamandla ayo,

nangesimo sayo esihle.

₁₃Ngubani ongayihlubula

isembatho sayo esingaphandle na?

Ngubani ongangena phakathi

kwemihlathi yayo emibili na?

₁₄Ngubani ongavula izicabha zomlomo wayo na?

Amazinyo ayo ayesabeka nxazonke.

₁₅Umhlane wayo uyizinhla zezihlangu,

zinamatheliswe njengophawu.

₁₆Zisondelene,

akungeni moya phakathi kwazo.

₁₇Zihlanganiswe ndawonye, zinamathelene, azinakwehlukaniswa.

₁₈Ukuthimula kwayo kuveza ukukhanya,

amehlo ayo afana nemisebe yokusa.

₁₉Emlonyeni wayo kuphuma izihlonti,

kuqhashe izinhlansi zomlilo.

₂₀Kuphuma intuthu emakhaleni ayo,

sengathi kubila ibhodwe

noma kusha imihlanga.

₂₁Ukuphefumula kwayo kokhela amalahle,

kuphuma ilangabi emlonyeni wayo.

₂₂Entanyeni yayo kuhlala amandla,

ingebhe isine phambi kwayo.

₂₃Izicubu zayo zinamathelene,

ziphicelwe kuyo azinakwehlukaniswa.

₂₄Inhliziyo yayo iqine njengetshe,

yebo, iqinile njengetshe lokusila elingaphansi.

₂₅Uma ivuka,

abanamandla bangenwa yitwetwe

ngenxa yevuso,

baphela amandla.

₂₆Noma inkemba, umkhonto, umcibisholo

nengcula kufinyelela kuyo,

akunamthelela kuyo.

₂₇Insimbi iyithatha njengotshani,

nethusi njengebunga.

₂₈Umcibisholo awunakuyixosha,

namatshe endwayimane aphenduka amabibi kuyo.

₂₉Izagila zifana namakhoba kuyo,

iyakuhleka ukukhenceza kwengcula.

₃₀Ingaphansi layo linjengezindengezi ezibukhali,

yenaba njengesibhulo odakeni.

₃₁Yenza izinzulu zibile njengebhodwe,

ulwandle ilwenze lufane nomfuma wamafutha.

₃₂Ishiya umgudu ocwebezelayo emva kwayo,

utwa kube sengathi lungwevu.

₃₃Emhlabeni akukho okufana nayo,

yenziwe yangaba nakwesaba.

₃₄Ikubona konke okuziphakamisayo,

iyinkosi phezu kwabo bonke

abantwana abazikhukhumezayo.”