UJobe 5

₁“Ake umemeze:

ukhona yini okuphendulayo na?

Yimuphi kwabangcwele oyakuphendukela kuye na?

₂Ngokuba isiwula sibulawa ngukukhathazeka,

nesiduphunga sibhujiswa ngumhawu.

₃Ngisibonile isiwula sisimama

siba nezimpande,

ngase ngiqalekisa indlu yaso

ngokuphazima kweso.

₄Abantwana baso abavikelekile impela,

bayagandaywa esangweni,

abanaye umhlengi.

₅Isivuno sabo sidliwa ngabalambileyo,

basikhipha ngisho emeveni,

nabanxaniwe balangazelela ingcebo yabo.

₆Usizi aluveli othulini,

nenhlupheko ayiphumi emhlabathini.

₇Wonke umuntu uzalelwe ukuhlupheka,

njengoba nezinhlansi

ziqhasha zibheke phezulu.

₈“Kepha mina bengiyakumfuna uNkulunkulu,

kuNkulunkulu bengiyakuyibeka indaba yami,

₉Yena owenza izinto ezinkulu,

ezingaphenyekiyo,

izimangaliso ezingenakubalwa,

₁₀Yena onisa imvula emhlabeni,

athumele amanzi ebusweni bomhlaba,

₁₁ukuze aphakamise abaphansi,

aphakamisele phezulu,

endaweni ephephileyo, abakhalayo.

₁₂Ubhuntshisa amacebo abanobuqili,

ukuze izandla zabo zingabi nampumelelo.

₁₃Ubamba abahlakaniphileyo ebuqilini babo,

achithe ngokushesha iseluleko soyisigwegwe.

₁₄Bahlangabezana nobumnyama emini kwabha,

baphuphutheke emini,

kube sengathi kusebusuku.

₁₅Kepha abantulayo

uyabasindisa enkembeni yemilomo yabo,

nasesandleni sonamandla.

₁₆Ngakho-ke ompofu

unethemba;

ububi buvale umlomo wabo.

₁₇“Uyadela lowo muntu

uNkulunkulu amsolayo,

ngakho-ke ungakwedeleli

ukuqondisa kukaSomandla.

₁₈Ngokuba uyalimaza,

abuye abophe,

uyashaya, kodwa izandla zakhe

zibuye ziphilise.

₁₉Uyokuhlenga ezinhluphekweni

eziyisithupha,

yebo, nakweziyisikhombisa

awuyukuthintwa wububi.

₂₀Endlaleni uyakukuhlenga, ungafi,

akukhulule nasemandleni enkemba empini.

₂₁Uyakukufihla olimini oluhlabayo,

awuyukwesaba ukubhubha lapho kufika.

₂₂Ukubhubha nendlala uyokuhleka usulu,

ungazesabi nezilo zomhlaba.

₂₃Ngokuba unesivumelwano namatshe asendle,

izilo zasendle zihlalisana ngokuthula nawe.

₂₄Uyokwazi ukuthi ithende lakho liphephile,

lapho uhlola indlu yakho,

uyothola ukuthi awulahlekelwe yilutho.

₂₅Uyokwazi ukuthi

izizukulwane zakho ziyakuba ziningi,

nabozalo lwakho babe njengotshani emhlabeni.

₂₆Uyokufa usumdala impela,

njengesixha samabele esibhulweni,

ngesikhathi sawo.

₂₇Bheka lokhu, sikuphenyisisile,

kunjalo, kulalele,

ukwazi wena luqobo.”